2014 jyly jańartylatyn energııa kózderinen óndiriletin elektr energııasynyń kólemi jylyna 1 mlrd. KVt/saǵ. quraýy tıis - Á. Isekeshev
ASTANA. Sáýirdiń 27-si. QazAqparat /Ernur Aqanbaı/ - Údemeli ındýstrııalyq-ınnovatsııalyq damý jónindegi memlekettik baǵdarlamaǵa sáıkes, 2014 jyly jańartylatyn energııa kózderinen óndiriletin elektr energııasynyń kólemi jylyna 1 mlrd. KVt/saǵ. quraýy tıis, bul tutynylatyn elektrdiń jıyntyq kóleminen 1 paıyzǵa artyq.
Bul týraly búgin Astanada ótken energetıkalyq salany damytý perspektıvasyna arnalǵan keńeste vıtse-premer- ındýstrııa jáne jańa tehnologııalar mınıstri Áset Isekeshev aıtty, dep habarlaıdy QazAqparat.
Onyń sózine qaraǵanda, bul ındýstrııalandyrý baǵdarlamasynyń maqsatty ındıkatorlarynyń biri. Ony júzege asyrý úshin mınıstrliktiń tıisti qurylymdyq bólimsheleri «Energııany únemdeý týraly» zańdy qabyldaýdy tezdetýi, energııany únemdeıtin is-sharalardy ázirleýge kirisýi, sondaı-aq elektr energııasynyń balansyna jańartylatyn energııa kózderin tartý jónindegi jospardy ázirlep, bekitýi tıis. «Qazirgi zamanda elektr energetıkasyn damytý generatsııalanatyn jáne jelilik aktıvterdi qalpyna keltirýmen ári damytýmen ǵana emes, sonymen birge eń aldymen energııany tıimdi paıdalanýmen, energııany únemdeýmen, ekologııalyq problemalardy sheshýmen baılanysty. Kıoto kelisimin jáne basqa da birqatar halyqaralyq ekologııalyq konventsııalardy ratıfıkatsııalaýǵa baılanysty biz «parnıktik áserdi» tómendetý jónindegi jumysty júrgizýge mindettimiz», dedi Á. Isekeshev.
