2014 jyly salynǵan aıyppuldardyń jalpy somasy 26 mlrd. teńgeden asty - QR ІІM
ASTANA. QazAqparat - Byltyr 3 mıllıon 326 myń ákimshilik quqyq buzýshylyq anyqtaldy. Bul týraly búgin Astanada Ortalyq kommýnıkatsııalar qyzmetindegi «Ákimshilik quqyq buzýshylyq týraly kodekstiń jańa redaktsııasynyń negizgi qaǵıdalary týraly» atty brıfıngte QR ІІM Ákimshilik polıtsııa komıtetiniń tóraǵasy Igor Lepeha málim etti.
Barlyq ákimshilik quqyq buzýshylyqtardyń negizgi úlesin polıtsııa qyzmetkerleri anyqtaıtyndyǵyna toqtalǵan komıtet basshysy: «Atap aıtqanda, ótken jyly biz 3 mıllıon 326 myń ákimshilik quqyq buzýshylyqty anyqtadyq, bul onyń aldyndaǵy jylmen salystyrǵanda 20 paıyzǵa artyq», - dedi.
Onyń sózine qaraǵanda, jol qozǵalysy erejesi salasynda tirkelgen ákimshilik quqyq buzýshylyq 2 mln. 321 myńǵa jetti. Bul baǵytta da ósim 24 paıyzdy qurady.
«Salynǵan aıyppuldardyń jalpy somasy 26 mlrd. 42 mln. teńgeni qamtydy. Onyń ishinde jol erejesin buzǵany úshin 21 mlrd. 672 mln. teńgeni qurady», - dedi I.Lepeha.
