2014 jyly memlekettik JOO-larda Baqylaýshy keńesi qurylady - A.Sárinjipov
ASTANA. 16 jeltoqsan. QazAqparat - 2014 jyly memlekettik joǵary oqý oryndarynda Baqylaýshy keńesi qurylady. Bul týraly «KTK» telearnasynyń «Halyq qyzmetshisi» baǵdarlamasynda qonaq bolǵan QR Bilim jáne ǵylym mınıstri Aslan Sárinjipov aıtty.
«Biz 2014 jyly barlyq memlekettik joǵary oqý oryndarynda Baqylaýshy keńesin engizýdi josparlaýdamyz. Bizde 50-den astam memlekettik JOO bar. Baqylaýshy keńesin qurý jáne olarǵa durys ókilettik berý úshin normatıvtik bazasyn daıyndaýmen aınalysyp jatyrmyz», - dedi ol.
Mıınstrdiń atap ótýinshe, aldaǵy ýaqytta rektor óz jumysy men josparlaryn Baqylaýshy keńespen úılestiretin bolady. Al keńes rektordyń jumysyn baǵalaıdy. Sonymen qatar joǵary oqý orynynyń qarjylyq máselelerin sheshý isine de tikeleı Baqylaýshy keńes atsalysady.
Sondaı-aq A.Sárinjipov jalpy bilim beretin mektepterdegi oqýshylardan aqsha jınaý máselesine de toqtala kele, zańǵa sáıkes memlekettik mektepter ata-analardan qandaı da bir tólem talap etýge quqyly emestigin bas aıtty. «Eger meıram, is-shara ótkizýge qosymsha qarjy qajet bolsa, onda munyń barlyǵy ata-analardyń kelisimimen ǵana sheshilýi tıis. Bizde orta bilim barlyǵy úshin tegin beriledi», - dedi mınıstr.
