2014 jyly memlekettik eńbek ınspektorlary 12,6 myń jumyskerdiń quqyǵyn qorǵady

ASTANA. QazAqparat - Memlekettik eńbek ınspektorlary 2014 jyly atqarǵan is-sharalar nátıjesinde 12,6 myń jumyskerdiń quqyǵy qorǵalyp, olarǵa 1,5 mlrd. teńge tólendi. Bul týraly QR Densaýlyq saqtaý jáne áleýmettik damý mınıstrliginiń baspas óz qyzmeti habarlady.

Ótken jyly memlekettik eńbek ınspektorlary respýblıkanyń 216 kásipornynda 13,7 myń jumysker aldynda jalaqy boıynsha 1,6 mlrd. teńgeden asa qaryz bar ekenin anyqtady.

Atalǵan kásiporyndardyń jetekshilerine oryndalýǵa mindetti 154 uıǵarym berilip, 13 mln. teńgeden astam somaǵa aıyppul salyndy.

Atqarylǵan sharalar, onyń ishinde jalaqy boıynsha qatań kesteler jáne qaryzdy óteý merzimin naqty belgileý nátıjesinde 12,6 myń jumyskerdiń quqyǵy qorǵaldy. Olarǵa 1,5 mlrd. teńge tólendi.

Jalpy, ótken jyly memlekettik eńbek ınspektorlary 7232 tekseris júrgizip, 21 myńnan astam QR eńbek zańnamasyn buzý faktilerin anyqtap, 287,4 mln. teńge somaǵa aıyppul saldy.