2014 jyly Qazaqstannyń Keden odaǵy aıasyndaǵy eksportynan oń dınamıkalar kútiledi - T. Jaqsylyqov

ASTANA. 10 qańtar. QazAqparat - 2014 jyly Qazaqstannyń Keden odaǵy aıasyndaǵy eksportynan oń dınamıkalar kútiledi. Bul týraly búgin Astanada Eýrazııalyq ekonomıkalyq odaq týraly kelisim jobasyn talqylaýǵa arnalǵan beıne-konferentsııa barysynda QR Ekonomıka jáne bıýdjettik josparlaý vıtse-mınıstri Tımýr Jaqsylyqov málim etti.

«Sońǵy úsh jylda, ıaǵnı byltyrdy qospaǵandaǵy 2010-2012 jyldary Keden odaǵy aýmaǵyndaǵy taýar aınalymy eki esege artty. Naqtylap aıtqanda, Reseı jáne Belarýs elderimen Qazaqstannyń taýar aınalymy 24,5 mlrd. dollarǵa jetip otyr, onyń ishinde basym úles Reseımen arada oryn alǵan. Bul rette ımport pen eksport kórsetkishteriniń ózgerisine kelsek, jaǵymsyz boljamdarǵa qaramastan bul baǵyttaǵy sandar bir deńgeıde bolyp otyr. Óıtkeni, ımport pen eksport ta birdeı úsh jyl ishinde 91 jáne 92 paıyzǵa deıin ósip otyr», - deıdi ol.

Onyń aıtýynsha, alǵashqy 2010-2011 jyldary qazaqstandyq eksport údemeli qarqynmen ósse, 2012 jyldan bastap Reseı men Belarýs tarapynan taýar ımporty údeı túsip, qazaqstandyq eksport qarqyny baıaýlaǵan. «Solaı bola tursa da, jalpy alǵanda qazaqstandyq eksportqa qatysty belgili bir basymdyqtar barshylyq. Sondyqtan da, bizdiń taraptyń ekonomıkalyq turǵydan «joǵaltatyny» týraly aıtylatyn qaýipterge men qosylmaımyn. Aıtarlyqtaı basymdyqtar barshylyq. Soǵan oraı, 2014 jyly dınamıkanyń oń ózgeristerin kútemiz», - dedi T. Jaqsylyqov.