2014 jyly Qazaqstanda bes júrdek temirjol baǵyty iske qosylady - KKM
ASTANA. 17 qazan. QazAqparat - 2014 jyly Qazaqstanda bes júrdek temirjol baǵytyn iske qosý josparlanǵan, dep habarlady Kólik jáne kommýnıkatsııa mınıstriliginiń baspasóz qyzmetinen.
«2014 jyly Astana - Qyzylorda, Almaty - Aqtóbe, Almaty - Zaşıta, Astana - Zaşıta jáne Almaty - Tashkent baǵyttarynda júrdek poıyzdardy iske qosý josparlanýda. Atalǵan baǵyttardyń ashylýy osy óńirlerdegi jolaýshylar tasymalyna degen joǵary suranysty qanaǵattandyrýǵa múmkindik beredi, sondaı-aq ár baǵyt boıynsha jol júrý ýaqyty ortasha eseppen 1,5-2 esege deıin qysqarmaq», - delingen vedomstvo málimdemesinde.
Sonymen qatar, belgili bolǵandaı, Astanadan Qyzylordaǵa jolaýshylar qazirgideı 2 táýlikte emes, bir táýliktiń ishinde jetetin bolady. Astana-Zaşıta júrdek poıyzy bolsa Pavlodar stantsııasyna aıaldaıtyn bolady.
Aǵymdaǵy jyly Almaty - Atyraý, Astana - Atyraý jáne Astana - Semeı baǵyttarynda jańa júrdek poıyzdarynyń iske qosylǵanyn aıtyp ótý kerek. Atalǵan baǵyttar boıynsha jol júrý ýaqyty eki esege deıin qysqartyldy. Barlyq poıyzdar 27 «Talgo» vagondarynan quralǵan. Sondaı-aq, 2013 jylǵy qańtarda Pavlodar - Astana baǵytyndaǵy jolaýshylar poıyzynyń baǵyty Qaraǵandyǵa deıin, al Astana - Oral baǵytyndaǵy jolaýshylar poıyzynyń baǵyty Aqtóbe qalasyna deıin uzartylǵan bolatyn.
Kólik jáne kommýnıkatsııa mınıstrliginiń málimetinshe, 2013 jyldyń 9 aıynda tasymaldanǵan jolaýshylar sany 19,9 mln. adamdy qurady, bul ótken jyldyń sáıkes merzimimen salystyrǵanda 9,3%-ǵa artyq. Jolaýshylar vagondaryn jańartý úshin aǵymdaǵy jyly 174 jolaýshylar vagony satyp alynǵan, onyń ishinde 125 Tulpar - Talgo vagony. Jyldyń sońyna deıin taǵy da 51 vagon alý josparlanǵan.
