2014 jyly ǵaryshtyq mindet júktelgen qazaqstandyq zymyrandy qurýdy usynamyz - "Báıterek" Qazaqstan-Reseı birlesken kásipornynyń qyzmetkerleri
ALMATY. Aqpannyń 13-i. QazAqparat /Erlik Erjanuly/ - Qazaqstannyń ǵylymı-tehnıkalyq jáne tehnologııalyq damýy men ǵaryshtyq derjavalardyń qataryna ený úshin 2014 jyly ǵaryshtyq mindet júktelgen qazaqstandyq zymyrandy qurýdy usynamyz.
Bul týraly keshe Almatyda ótken ǵaryshtyq júıeler men keshender jasaý jobalaryn ǵylymı-tehnologııalyq qamtamasyz etý týraly semınar-dóńgelek ústel jıynynda aıtyldy, dep habarlaıdy QazAqparat.
"Báıterek" Qazaqstan-Reseı birlesken kásipornynyń qyzmetkeri Erjan Nurǵalıevtiń aıtýynsha, bul zymyran myna talaptardy qanaǵattandyrýy kerek. Jobalaý, jasaý, synaý jáne qurastyrý qazaqstandyq kásiporyndarda júrgizilip, ony Baıqańyr ǵarysh aılaǵynda qazaqstandyq mamandar ushyrýy kerek. Keıbir bólshekteri men toraptary sheteldik daıyndaýshylardan alynýy múmkin. Úshinshi elderge "Qazǵarysh" ulttyq ǵarysh agenttigimen tikeleı kelisim arqyly kommertsııalyq negizde qyzmet kórsetý.
"Ǵaryshqa zymyran tasymaldaǵyshtar naryǵynyń 90 paıyzdan astamy - Arianespace, ILS jáne BLS kompanııalarynyń úlesinde. Aldaǵy 10 jyldaǵy bul naryq 20-25 mıllıard dollarǵa baǵalanyp otyr. Bul somanyń jartysy ǵaryshtyq apparattardy engizý úshin satyp alynatyn zymyran tasymaldaǵyshtardy satyp alýǵa jumsalmaq. Máselen, ILS kompanııasy 2003- 2015 jyldary 150 zymyran tasymaldaýshyny ushyrýdy josparlap otyr. Onyń 86-sy 2008-2015 jyldardyń úlesine tıedi. Bul jalpy naryqtyń 38 paıyzy", deıdi Erjan Nurǵalıev. Onyń paıymdaýynsha, ǵaryshtyq mindet júktelgen qazaqstandyq zymyrandy qurý elde zymyran-ǵarysh salasynyń qalyptasýyna jol ashady. "Ǵaryshtyq mindet júktelgen jáne alǵashqy satyǵa qaıtyp oralatyn ekologııalyq qaýipsiz zymyrandy qurastyrý" jrobasynyń quny 1,8 mıllıard eýrony quraıdy. Bul óz qunyn 6 jylda aqtap shyǵady. Ony qarjylandyrýdy bıýdjetten tys ishki jáne syrtqy quraldar arqyly júrgizgen durys. Máselen, zaemdyq vekselder shyǵaryp ornalastyrý, nesıelik quraldar tartý jáne taǵy basqa da joldarmen. Tek joba memleket tarapynan baqylanyp, jumys qorytyndysy Qazaqstanǵa tıesili bolýy kerek.
