2014 jyly Astanada paralımpıadalyq sportshylarǵa arnalǵan olımpıadalyq ortalyq ashylady
ASTANA. 15 tamyz. QazAqparat - 2014 jyly Astanada múgedek sportshylarǵa arnalǵan olımpıadalyq ortalyq ashylady. Bul týraly búgin Astanada ótken baspasóz máslıhatynda QR Sport jáne dene shynyqtyrý isteri agenttigi tóraǵasynyń orynbasary Tastanbek Esentaev málim etti.
«Kelesi jyly Astanada múgedek sportshylardyń jetistikterin arttyrýǵa jaǵdaı jasaıtyn olımpıadalyq ortalyq ashylady. Úkimet tarapynan 129 mln. teńge qarajat bólindi. Bul - qamkóńil sportshylarǵa arnalǵan qamqorlyq», - dedi T.Esentaev.
Onyń aıtýynsha, keıingi jyldary paralımpıadalyq jáne sýrdlımpıadalyq sportshylarymyzdyń álemdik arenadaǵy jetistikteri artyp keledi. Sondyqtan olarǵa memleket tarapynan úlken qoldaý kórsetilýde.
«26 shilde men 6 tamyz aralyǵynda Sofııada ótken Sýrdlımpıadalyq oıyndarda bizdiń jerlesimiz Ǵabıt Esjanov altyn medal enshiledi. Búgingi kúni Kanadada ótip jatqan Álem chemıponatynda Qazaqstan tarıhynda alǵash ret sýda júzýden bizdiń paralımpıadalyq sportshymyz álemdik rekord ornatty. Alaıda chempıonattyń kúmis medaline ıe boldy. Mine, qazirgi ýaqytta bizdiń elimizde múgedekter sportyn damytýǵa barlyq jaǵdaılar jasalyp jatyr. Qarjylandyrý, uıymdastyrý jaǵynan búkil múmkindikter bar. Qazaqstandyq múgedek sportshylar jospar boıynsha, belgilengen jarystardyń barlyǵyna qatysýda», - dep atap ótti ol.
