2014 jyly Astanada fızıka páni boıynsha 45-shi Halyqaralyq olımpıada ótedi - QR BǴM
ASTANA. 17 shilde. QazAqparat - Kelesi jyly Qazaqstan fızıka páni boıynsha 45-shi Halyqaralyq olımpıadanyń uıymdastyrýshysy bolady, dep habarlady QR Bilim jáne ǵylym mınıstrliginiń baspasóz qyzmeti.
Bıyl atalǵan olımpıada Danııa astanasy Kopengagen qalasynda ótti, ol jerde Qazaqstan qurama komandasyna «IPhO kitaby» tabystaldy, onda Astana 2014 jyly fızıkanyń álemdik astanasy bolyp belgilengen. Bul kitap Estonııadan bastalyp, Danııada jalǵasyp, Qazaqstanǵa 45-shi Halyqaralyq olımpıada uıymdastyrýshysy retinde tabystaldy.
«Jeńimpazdardy marapattaǵan soń Danııanyń uımdastyrý komıteti Qazaqstannyń qurama komandasyna saltanatty túrde fızıka boıynsha halyqaralyq olımpıadanyń týyn, ıaǵnı kelesi jyly fızıka olımpıadasyn Qazaqstan Respýblıkasynda ótkizý boıynsha estafeta retinde tabystady», - delingen primeminister.kz saıtynda.
Aıta ketý kerek, ústimizdegi jyly Kopengagendegi olımpıadaǵa 81 elden 374 oqýshy qatysty. Oǵan qosa, Qazaqstan komandasynan 5 adam qatysyp, 4 kúmis jáne 1 qola medal jeńip aldy.
Osylaısha, Astana qalasyndaǵy QTL 11-synyp oqýshysy Aıdar Jetesov, Aqtóbe QTL 10-synyp oqýshysy Ámir Bralın, Taraz qalasyndaǵy QTL 11-synyp oqýshysy Musa Radjamov jáne Almaty qalasynyń RMFMOMI 11-synyp oqýshysy Nurıslam Tursynbek kúmis ıegerleri atandy. Óz kezeginde, Taraz qalasyndaǵy QTL 10-synyp oqýshysy Dinmuhammed Nurbek qola júldeger boldy.
