2014 jyly álemdik ekonomıka ósimi 3,3 paıyzdy quraıdy - E. Dosaev
ASTANA. QazAqparat -Halyqaralyq valıýta qorynyń qazan aıyndaǵy boljamyna sáıkes, 2014 jyly álemdik ekonomıka ósimi 3,3 paıyzdy quraıdy, bul buǵan deıingi boljamǵa 0,1 paıyzǵa tómen. Búgin Parlament Májilisiniń jalpy otyrysynda Ulttyq ekonomıka mınıstri Erbolat Dosaev málim etti. Jalpy otyrysta «2014-2016 jyldarǵa arnalǵan respýblıkalyq bıýdjet týraly» zańyna ózgerister men tolyqtyrýlar engizý týraly» zań jobasy talqylanyp jatqanyn eske salamyz.
Mınıstrdiń sózine qaraǵanda, bıyl Reseı ekonomıkasy ósimi 0,2 paıyz deńgeıinde kútiledi. Al maýsymnyń ortasynan bastap álemdik munaı baǵasynyń 25,8 paıyzǵa, ıaǵnı barreline 115,1 dollarynan búgingi 85,4 dollarǵa turaqty tómendegeni baıqalǵan.
«Jalpy alǵanda aǵymdaǵy jyldyń damý qorytyndylary eldiń ekonomıkasyna teris yqpalyn tıgizip otyr. Eldiń syrtqy aınalymy aǵymdaǵy jyldyń segiz aıynda 9,1 paıyzǵa, ıaǵnı 88,5 mlrd. dollardan 80,4 mlrd. dollarǵa deıin tómendedi, onyń ishinde ımport 14,7 paıyzǵa azaıdy. Munaı men metaldyń álemdik baǵalarynyń tómendeýimen qatar, Reseıge eksport ta 20 paıyzǵa tómendedi», - dedi E. Dosaev.
