2014 jyly 83 myń shetel azamaty QR kóshi-qon zańnamasyn buzǵany úshin jaýapqa tartyldy - QR ІІM
ASTANA. QazAqparat - Ótken jyly QR kóshi-qon zańnamasyn buzǵany úshin 83 myń shetel azamaty ákimshilik jaýapkershilikke tartylǵan. Olardyń basym bóligi Ózbekstan azamattary bolyp otyr. Bul týraly búgin QR ІІM Kóshi-qon polıtsııasy departamentiniń basshysy Serik Saıynov aıtty.
«Byltyr biz ákimshilik jazaǵa 83 myń shetel azamatyn tarttyq, olardyń kóbi Ózbekstan azamattary. Óıtkeni, olar kóbine bes kún ishinde tirkelý týraly zańdy buzady, tranzıttik jol júrý, ýákiletti organnyń ruqsatynsyz jumys isteý sııaqty zańbuzýshylyqtar jasaıdy», - dep túsindirdi ol búgin QR Parlamenti Senatynyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda. Aıta keteıik, otyrysta «Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy Adamdardyń readmıssııasy týraly kelisimdi jáne Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy Adamdardyń readmıssııasy týraly kelisimdi iske asyrý tártibi týraly atqarý hattamasyn ratıfıkatsııalaý týraly» zań jobasy talqylandy. «Byltyr biz shetel azamattaryna jeke tulǵalardyń jumysyn isteýge zań júzinde ruqsat berdik, al qurylysta nemese basqa da jerlerde zańdy tulǵalardyń jumysyn isteý zańsyz jáne biz ondaılardy ustasaq, jazaǵa tartamyz», - deıdi S. Saıynov. Onyń aıtýynsha, 1 qańtardan bastap jańa Ákimshilik kodeks boıynsha kóshi-qon zańnamasyn buzǵan shetel azamataryna da, olardy shaqyrǵan tarapqa da 10 AEK-ten bastap odan da joǵary aıyppuldar salynady.
