2014 jyly 5 myń shartty túrde sottalǵan adamǵa áleýmettik-quqyqtyq kómek kórsetildi
AQTAÝ. QazAqparat - 2014 jyly keminde 4900 shartty túrde sottalǵan adamǵa ártúrli áleýmettik-quqyqtyq kómek alýǵa járdem kórsetildi. Bul málimetter Aqtaýda ótken bas bostandyǵynan aıyrmaı qylmystyq jaza qoldaný praktıkasyn jetildirý jónindegi respýblıkalyq keńeste málim etildi.
Áleýmettik-quqyqtyq kómek alýǵa 1-shi jáne 2-shi toptardaǵy 36 múgedekke, 149 alkogolım, nashaqorlyq, toksıkomanııa aýrýlaryna ushyraǵandarǵa, 149 aýrýǵa (sot úkimimen), 23 týberkýlezge shaldyqqan jandarǵa, 93 basqa da keselderge ushyraǵandarǵa, 1428 psıhologııalyq járdem kútken jandarǵa, 106 bilimi joq jáne 1715 jumyssyz adamdarǵa, 8 turǵylyqty mekeni joq adamǵa kómek kórsetilgen.
«Sharanyń neizgi maqsaty shartty túrde sottalǵan adamdarǵa áleýmettik-quqyqtyq kómek kórsetýdi jetildirýdi jáne baıqap kórý qyzmetin odan ári damytýdy kózdeıdi», - dedi ІІM QAJ Komıteti tóraǵasynyń orynbasary Meıram Aıýbaev.
Ol qazirgi kezde Qazaqstannyń qylmystyq saıasaty álemniń damyǵan memleketteriniń tájirıbesin eskere otyryp, keıbir qylmystyq jazalardy izgilendirýge, sondaı-aq bas bastandyǵynan aıyrmaı jazalaýdy qoldaný salasyn keńeıtýge baǵyttalǵanyn atap ótti.
Búginde baıqap kórý qyzmetinde bes myńnan astam sottalǵandar esepte tur, olardyń 769-y áıelder, 48-i kámeletke tolmaǵandar.
Barlyq qylmystardyń ishinde 370-i onsha aýyr emes, 1195-i - ortasha aýyr qylmystar, 3569-y aýyr qylmystar. Olar úshin áleýmettik-quqyqtyq kómek alý baǵdarlamasy jasaldy jáne tıisti organdar men uıymdarǵa jiberildi.
Keńeste baıqap kórý qyzmetin odan ári jetildirýdiń negizgi baǵyttary belgilendi jáne zańnamalardy, jergilikti atqarý organdary men baıqap kórý qyzmetteriniń ózara tıimdi is-qımylyn odan ári jetildirý jóninde usynbalar qabyldandy.
