2014 jylǵa qaraı Qazaqstan turǵyndaryn tolyǵymen ózindik elektr energııasymen qamtamasyz etedi
ASTANA. Qyrkúıektiń 30-y. QazAqparat /Marlan Jıembaı/ - 2014 jylǵa qaraı Qazaqstan ózinde óndiriletin energııa kózderi arqyly turǵyndardy elektr energııasymen tolyq qamtamasyz etedi.
Bul týraly búgin elordada ótken kómirdi óndirý men óńdeýdiń ekologııalyq taza tehnologııasyna arnalǵan semınar barysynda QR Indýstrııa jáne jańa tehnologııalar mınıstrligi Elektr energetıkasyn jáne kómir ónerkásibin damytý departamentiniń dırektory Jaqyp Bókenbaev aıtty.
Elimizdiń 2010-2014 jyldarǵa arnalǵan elektr energetıkasyn damytý memlekettik baǵdarlamasyn júzege asyrýdyń negizgi nátıjeleriniń biri elimizdi tolyǵymen ózinde óndiriletin elektr energııamen qamtý ekendigin atap ótken ol, «eger qazirgi tańda bul úles shamamen 98 paıyzdy qurap otyr. al baǵdarlama sheńberinde júzege asyrylatyn sharalardyń nátıjesinde ol 100 paıyzǵa jetýi kerek», dedi.
Onyń atap ótýinshe, atalǵan baǵdarlamanyń maqsatty ındıkatoryna sáıkes tutynýdyń boljamdy kólemi saǵatyna 96,8 kVt bolǵanda 2014 jyly elektr energııasyn óndirýdi saǵatyna 97,9 kVt-qa jetkizý josparlanyp otyr.
Sondaı-aq departament basshysynyń sózine qaraǵanda, salalyq baǵdarlamany júzege asyrý boıynsha is-sharalar josparyna elektr jelileri nysandaryn damytý, olardyń qoldanystaǵy qýatyn keńeıtý, jańartý syndy 13 mańyzdy joba engizilgen.
