2014 jylǵa qaraı Qazaqstan Reseıge jylyna 60 myń tonna et eksporttaýdy josparlap otyr

Bul týraly búgin Astanada ótken Onlaın -konferentsııa barysynda aýyl sharýashylyǵy vıtse-mınıstri Arman Evnıev málim etti, dep habarlaıdy QazAqparat.

«93-94 jyldary Qazaqstan jylyna 347 myń tonna et eksporttady. Atap aıtqanda, biz buǵan deıin osyndaı eleýli kórsetkishterge qol jetkizgen edik», dedi vıtse-mınıstr.

Onyń sózine qaraǵanda, búginde Reseı naryǵy 1 mln. 700 myń tonna etti quraıdy. Onyń ishinde jylyna 700 myń tonnasy iri qara eti. Reseıge búginde ettiń bir qatar úlesi Brazılııa men Argentınadan ımporttalatynyn jetkizgen A. Evnıev Qazaqstannyń búgindegi maqsaty atalǵan eki elmen básekege túsý ǵana emes, sonymen qatar Keden odaǵy keńistigin sapaly ónimmen tolyqtyrý ekenin jetkizdi.

«Osyndaı múmkindikterge búginde jol ashylyp otyr jáne Reseı tarapymen ózara tolyq túsinistik bar», dedi ol.

Sáýirdiń 19-ynda eki eldiń aýyl sharýashylyǵy mınıstrlikteri birlesken alqa májilisinde atalǵan máseleni talqylaǵanyna toqtaǵan A. Evnıev, bul jıyn barysynda Qazaqstannyń et eksportyna qatysty barlyq máseleler tyńǵylyqty qaralǵanyn aıtyp ótti.

«Atap aıtqanda, Qazaqstan etiniń satylýyna kedergi bolǵan barlyq máseleler talqylandy. Bizdiń ettiń eksportyna buǵan deıin elimizdiń 4 oblysyna jol ashylǵan bolatyn, endi taǵy Reseı baǵytyndaǵy eksportqa 5 oblys qosylatyn bolady», dedi vıtse-mınıstr.

Onyń sózine qaraǵanda, shildeniń 1-ne qaraı elimizdiń veterınarlyq qyzmetteri barynsha daıyn bolýyna erekshe mán berilip otyr. A. Evnıevtiń málimetine qaraǵanda, 2008 jyly 900 tonna et eksporttalǵan. 2009 jyly 54 tonna, al 2010 jylǵa 5 myń tonna etti eksporttaýǵa maqsat qoıyp otyr.

«Sondaı-aq 2014 jylǵa qaraı Reseıge ettiń barlyq túrleri boıynsha 6 myń tonna eksporttaýdy belgilep otyrmyz», dedi vıtse-mınıstr.

A. Evnıev Máskeýde kúnine 2-5 myń bas aralyǵynda qoı soıylatynyn aıta kele, osy turǵyda Qazaqstanda úlken múmkindikter bar ekenin jetkizdi.