2014 jylǵa deıin Reseıden keletin munaı ımportynyń mólsheri saqtalyp, odan ári almasý operatsııalary júzege asady - Munaı jáne gaz mınıstri
ASTANA. 5 naýryz. QazAqparat - 2014 jylǵa deıin Reseıden keletin munaı ımportynyń mólsheri saqtalyp, odan ári almasý operatsııalary júzege asyrylatyn bolady.
Búgin Májiliste «Іshki naryqty munaımen jáne munaı ónimderimen qamtamasyz etý» jáne «Qarashyǵanaq jobasynyń úlesin memlekettiń satyp alýy» taqyryptaryndaǵy Úkimet saǵaty barysynda Munaı jáne gaz mınıstri Saýat Myńbaev osylaı málim etti.
«Byltyr Reseı munaıy Pavlodar jáne ishinara Shymkent munaı óńdeý zaýyttaryna jetkizilip turdy. Jalpy alǵanda elimizde ishki tutynýdyń jartysyna jýyǵy munaı ımportynyń esebinen bolyp otyr. Bundaı jaǵdaı belgili bir táýeldilikke ákep soǵýy múmkin. Al táýeldilikten qutylýǵa jáne bizdiń munaı óńdeý zaýattaryn otandyq ónimmen qamtamasyz etýge bola ma? Mundaı múmkindik ishinara Qazaqstan-Qytaı qubyryn salǵan ýaqytta paıda boldy. Degenmen munaı ımportynan qutylý máselesin naqty baǵalaý qajet etiledi. Óıtkeni, Pavlodar zaýyty bastapqyda batys sibir munaıyna jobalanǵan jáne otandyq munaıdy paıdalaný barysynda tehnologııalyq sıpattaǵy máseleler oryn alyp otyr. Tapshylyqtaǵy ashyq-tústi munaı ónimderiniń shyǵarýy azaıyp tur», - deıdi Saýat Myńbaev. Budan bólek, mınıstrdiń aıtýynsha, otandyq munaıdy qubyrlar arqyly tasymaldaý jáne temirjol arqyly jetkizý shyǵyny artyp otyr. Eń bastysy, respýblıkalyq bıýdjetten áleýetti shyǵystar edáýir somany quraıdy. «Іshki naryqqa baratyn jetkizilimge qaraǵanda eksporttyq jetkizilimge joǵary salyq salynady. Eger biz eksportymyzdy 7 mln. tonnaǵa azaıtyp, osy 7 mln. tonnany ishki naryqqa qaıta baǵyttasaq, onda bizdiń bıýdjetke túsim jylyna 1,8 mlrd dollar kem túsetin edi. Al Reseı 7 mln. tonna munaıdy Qazaqstanǵa jetkizý barysynda odan da kóp joǵaltady. Sebebi olardyń eksporttyq baj salyǵy bizge qaraǵanda joǵarylaý. Osyǵan oraı byltyrlary Reseı Qazaqstanǵa bajsyz munaı jetkizýdi dereý toqtatýǵa kóndirgisi keldi. Alaıda, kelissózder nátıjesinde osyndaı jetkizilimder 2014 jylǵa deıin saqtalatyn bolyp ýaǵdalastyq. 2014 jyldan keıin almasý operatsııalary júzege asyrylatyn bolady. Bul rette biz munaıdy Omby-Pavlodar qubyry arqyly alatyn bolamyz, al Qazaqstannyń dál osyndaı mólsherdegi kólemi Atyraý-Samara qubyry arqyly jetkiziledi», - deıdi S. Myńbaev.
Mınıstrdiń aıtýynsha, Qazaqstan Reseımen munaı almaspaı, tek satyp alyp otyrǵan jaǵdaıda kórshi eldiń ustanǵan baǵasyna esh áser ete almaımyz. «Qaıtkende de biz alyp otyrǵan Reseı munaıynyń baǵasy brend baǵasynan eki esege arzan. Al bunyń ózi Qazaqstanda tutynatyn munaıdyń teń jartysyna jýyq bolyp tabylady. Jalpy budan shyǵatyn qorytyndy bıýdjetten eleýli shyǵyn shyǵarmaı, biz erikti túrde munaı ónimderine baǵany tómendete almaımyz», - deıdi mınıstr.
