2014 jylǵa deıin 3 memlekettik medıtsınalyq joǵary oqý ornynda 1000 oryndyq 3 jataqhana salynady
ASTANA. 11 qańtar. QazAqparat - Qazaqstan Respýblıkasynyń densaýlyq saqtaý salasyn damytýdyń 2011- 2015 jyldarǵa arnalǵan «Salamatty Qazaqstan» memlekettik baǵdarlamasynyń basym baǵyttarynyń biri
medıtsınalyq jáne farmatsevtıkalyq bilimdi jetildirý bolyp tabylady.
Stýdentterdiń tájirıbelik daıarlyǵyn jaqsartý maqsatynda barlyq memlekettik medıtsınalyq bilim berý uıymdarynda qazirgi zamanǵa saı oqý-klınıkalyq ortalyqtar qurylyp, oqý sımýlıatorlarymen, zerthanalyq jáne medıtsınalyq qural-jabdyqtarmen qamtamasyz etildi. Bul maqsatqa bólingen qarjy kólemi 2007 jyly 556,1 mln. teńge, 2008 jyly - 499,9 mln. teńgeni qurasa, 2010 jyly oqý-klınıkalyq ortalyqtar 116,2 mln. teńgege, al 2011 jyly - 244,0 mln. teńgege qosymsha jaraqtandyryldy, dep habarlady QR Densaýlyq saqtaý mınıstrliginiń baspasóz qyzmeti.
Mınıstrlik úzdik oqytýshylardyń biliktiligin arttyrý maqsatynda Izraıl, Anglııa, AQSh, Danııa, Sıngapýr, Avstrııa, Avstralııa sııaqty elderdegi álemniń jetekshi ýnıversıtetterine oqýǵa jiberýge granttar bólýde. 2011 jyly professorlyq-oqytýshy quramnyń 177 ókili shetelderge baryp, jańa bilim berý tehnologııalaryn úırenip qaıtty. Halyqaralyq sarapshylardy elimizge shaqyrý arqyly medıtsınalyq JOO-nyń 500-deı oqytýshysy biliktilikterin arttyrdy.
Salanyń adam resýrstaryn basqarýdy jetildirý maqsatynda densaýlyq saqtaý salasynyń kadrlyq resýrstaryn damytý tujyrymdamasynyń jobasy ázirlendi. Joba sapaly qyzmetter kórsetýdi qamtamasyz etetin tıimdi kadr saıasatyn qalyptastyrýǵa baǵyttalǵan.
Sonymen qatar, stýdentterdiń baspana jaǵdaıyn jaqsartýǵa erekshe kóńil bólinýde. Atap aıtqanda, aǵymdaǵy jyly úsh memlekettik medıtsınalyq ýnıversıtette, atap aıtqanda, Almatydaǵy S.D. Asfendııarov atyndaǵy Qazaq ulttyq medıtsınalyq ýnıversıtetinde, Semeı memlekettik medıtsınalyq ýnıversıtetinde jáne Aqtóbedegi M. Ospanov atyndaǵy Batys Qazaqstan memlekettik medıtsınalyq ýnıversıtetinde 1000 oryndyq úsh jataqhana qurylysy bastalady.
Sondaı-aq, 2013-2015 jyldarǵa arnalǵan bıýdjetti qalyptastyrý sheńberinde Shymkenttegi Ońtústik Qazaqstan memlekettik farmatsevtıkalyq akademııasynda 500 oryndyq jataqhana qurylysyna qarjy bólý qarastyrylatyn bolady.
