2014 jyldyń І toqsanynda Qazaqstan-Qytaı taýar aınalymy 5 mlrd. dollarǵa jetti
ASTANA. QazAqparat - 2014 jyldyń 1-toqsanynda Qazaqstan-Qytaı taýar aınalymy 5 mlrd. dollarǵa jetti. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Premer-Mınıstriniń birinshi orynbasary Baqytjan Saǵyntaev aıtty.
Onyń atap ótýinshe, Qazaqstan men Qytaı arasynda saýda-ekonomıkalyq yntymaqtastyq barynsha qarqyndy damý ústinde. «2014 jyldyń 1 toqsanynda taýar aınalymy shamamen 5 mlrd. AQSh dollaryn qurap, 11 paıyz ósim kórsetti. QHR-ǵa eksport 3,5 mlrd. al Qytaıdan ımport 1,4 mlrd. dollardy qurady», - dedi ol.
Onyń atap ótýinshe, búginde Qytaı Qazaqstanǵa qarjy quıatyn shetel ınvestorlarynyń úzdik úshtigine kirip otyr. Máselen, 2005-2013 jyldary aralyǵynda bul elden kelgen tikeleı ınvestıtsııa kólemi 11 mlrd. AQSh dollaryna jetip jyǵylady. Tek ótken jyly ǵana 2,18 mlrd. dollar kóleminde qytaı ınvestıtsııa qazaq ekonomıkasyna quıyldy.
«Bul oń serpin Memleket basshysy alǵa qoıǵan 2016 jyly Qytaımen saýda kólemin 40 mlrd. dollarǵa jetkizý baǵytyndaǵy maqsattarǵa qol jetkizýge bolatyndyǵyn kórsetedi», - dedi B.Saǵyntaev.
