2014 jyldyń 1 qańtarynan Qazaqstanda shyǵarylatyn kólikterge Eýro-4 ekologııalyq standarty qoldanylady

Bul týraly búgin elordada ótip jatqan «Ekokólik, ekosáýlet» taqyrybyndaǵy semınarda QR Kólik jáne kommýnıkatsııa mınıstrligi Avtomobıl kóligi departamentiniń sarapshysy Moldabek Ábdenov málim etti.

«Búgingi semınar Qazaqstannyń ekologııalyq jaǵdaıyn jaqsartýǵa baılanysty ótip jatyr. Sondyqtan bizdiń mınıstrlik osy máselelerge arnalǵan Eýro-4 ekologııalyq standartyn engizý tusaýkeserin ótkizýde. Eýro-4 ekologııalyq standarty Qazaqstanǵa ımporttalatyn avtokólikter úshin osy jyldyń 2-shi jartyjyldyǵynda bastalady. Al Qazaqstanda shyǵarylatyn avtokólikterge 2014 jyldyń 1 qańtarynan bastap qoldanylady», - dedi ol.

Onyń atap ótýinshe, atalǵan standartqa kóshý eskirgen kólikterdi jańartýǵa múmkindik berip, kólikterdiń qozǵalysynan shyǵatyn zııandy qaldyqtar kólemin tómendetýge septigin tıgizedi.

Qazirgi tańda Qazaqstanda jyl saıyn 1 mln. 300 myń tonna zııandy qaldyqtar men 14 mln. tonnaǵa jýyq parnıkti gazdar shyǵarylady. Joǵaryda atalǵan zııandy qaldyqtardyń 60 paıyzy kólikterdiń enshisinde. «Al Almaty qalasynda bul kórsetkish 80 paıyzdan asyp otyr. Jalpy, 2012 jyldan osy ýaqytqa deıin zııandy qaldyqtar shyǵaryndylary úshin salynǵan aıyppul kólemi 857 myń teńgeni quraıdy»,- dedi M.Ábdenov.