2014 jyldan bastap zııandy óndiriste jumys isteıtin qyzmetkerlerge mindetti kásiptik zeınetaqy jarnalary tólene bastaıdy - Parlament
ASTANA. 12 jeltoqsan. QazAqparat - 2014 jyldyń 1 qańtarynan bastap aıryqsha jáne zııandy óndiriste jumys isteıtin qyzmetkerlerge mindetti kásiptik zeınetaqy jarnalary tólene bastaıdy. Bul týraly búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» QR zań jobasy boıynsha baıandaǵan Eńbek jáne halyqty áleýmettik qorǵaý mınıstri Tamara Dúısenova málim etti.
«Zań jobasynda jumys berýshilerdiń eńbek jaǵdaıyn jaqsartýǵa yntalandyrý maqsatynda óndiristik nysandardy attestatsııalaý nátıjelerimen rastalǵan zııandy, erekshe zııandy jáne qaýipti eńbek jaǵdaılary túzilgen kezde jumys berýshilerdi mindetti kásiptik zeınetaqy jarnalaryn tóleýden bosatý kózdeledi. Buǵan qosa, zań jobasynda ınvestıtsııalyq portfeldi basqarýshy qyzmetin júzege asyrý, qajetti qujattarmen qosa erikti jınaqtaýshy zeınetaqy qoryn erikti túrde joıý tártibin reglamentteý jónindegi normalardy naqtylaý usynylady», - deıdi mınıstr T. Dúısenova.
Onyń aıtýynsha, Baıqońyr qalasynyń aýmaǵynda turatyn Qazaqstan Respýblıkasynyń áıel azamattaryn áleýmettik qorǵaý maqsatynda zań jobasymen Reseı federaldy densaýlyq saqtaý uıymy bergen ýaqytsha eńbekke jaramsyzdyq paraǵynyń negizinde júktiligi men bosanýyna baılanysty tabysynan aıyrylý jaǵdaıyna áleýmettik tólem taǵaıyndaý da kózdeledi.
