2014 jyldan bastap Keden odaǵy aıasyndaǵy memlekettik satyp alýlarǵa teńdeı qol jetkizý engiziledi

Búgin Úkimet otyrysynda QR Básekelestikti qorǵaý agenttiginiń tóraǵasy Bolatbek Qýandyqov osylaı málim etti. Eske salsaq, Úkimet otyrysynda taýar naryqtarynda básekelestikti qorǵaý júıesin jetildirý máselesi talqylanǵan bolatyn.

Básekelestikti qorǵaý agenttigi tóraǵasynyń aıtýynsha, Qazaqstan naryǵyna erkin engennen soń iri sheteldik kompanııalar tarapynan básekege qarsy áreketter, karteldik kelisimder men adal emes is tájirıbeler kórinis berýi ábden múmkin. Ondaı qubylystardyń jaǵymsyz saldary da bolýy yqtımal.

«Al mundaı jaǵdaıda elimizdiń monopolııaǵa qarsy organy baqylaý jasaý quzyretine ıe emes ekenin eske salǵym keledi. Sondyqtan da, karteldermen, satyp alýlardy júzege asyrý barysyndaǵy saýda mámilelerimen kúresti kúsheıtý qajet dep esepteımiz. Bul úshin Básekelestikti qorǵaý agenttigine, onyń ishinde memlekettik satyp alý, saýda-sattyq, aýktsıondar rásimin baqylaýdy júzege asyrý fýnktsııalaryn berý máselesi sheshimin tapsa ıgi», - deıdi Bolatbek Qýandyqov.