2014 jyldan bastap Astanada balalardy pnevmokokk juqpasyna qarsy ege bastaıdy
ASTANA. 24 qarasha. QazAqparat /Gúlmıra Alıakparova/ - 2014 jyldan bastap Astanada pnevmokokk juqpasyna qarsy balalardy jappaı egý bastalady.
Búgin qala ákimdiginde ótken baspasóz máslıhatynda QR DSM Memlekettik sanıtarlyq-epıdemıologııalyq qadaǵalaý komıteti Astana qalasy boıynsha departamentiniń basshysy Sarqyt Beısenova málim etkendeı, Dúnıejúzilik densaýlyq saqtaý uıymynyń derekteri boıynsha, álemde pnevmokokk ınfektsııasynan paıda bolatyn syrqattardan jylyna 1,6 mln.-nan astam adam qaıtys bolady. Sonyń ishinde 1 mln.-ǵa jýyǵy - 5 jasqa tolmaǵan balalar. Al 1 jasqa tolmaǵan balalardyń shetineý úlesi 40 paıyzdy qurap otyr.
Al Qazaqstanda 2007-2009 jyldar aralyǵynda respıratorlyq jáne pnevmonııa aýrýlarynan 1 jasqa deıingi balalardyń qaıtys bolý kórsetkishi, barlyq ólim-jitim sebebiniń arasynda 3 orynda, al ınfektsııalyq aýrýlar boıynsha 1 orynda boldy.
Pnevmokokk - jedel pnevmonııanyń qozdyrǵyshy (ásirese, kishkentaı balalar men qarttarda). Qanǵa túsken jaǵdaıda qozdyrǵysh mı qabyqtarynyń, ókpeniń, býynnyń jáne taǵy basqa aǵzalardyń irińdi qabynýyna alyp keledi. Balalarda jıi kezdesetin klınıkalyq túrleri - jedel orta otıt (60 paıyzǵa deıin), pnevmonııa (65-80 paıyzǵa deıin) jáne menıngıt (5-20 paıyz).
TMD elderi ishinde Qazaqstan pnevmokokk juqpasyna qarsy egýdi kezeń-kezeńimen engizip otyrǵan elderdiń biri. 2010 jyldyń jeltoqsanynda vaktsınatsııalaý Shyǵys Qazaqstan men Mańǵystaý oblystarynda júrgizile bastady. 2011 jyly bul tizimge Jambyl men Ońtústik Qazaqstan oblystary engizildi. Al Astana qalasynda balalardy pnevmokokke qarsy egýdi 2014 jyly bastaý josparlanyp oytr.
S.Beısenova atap kórsetkendeı, egý úshin quramynda pnevmokokktyń 13 serotıpi bar AQSh-ta óndirilgen vaktsınalar qoldanylady. Egý 2, 4 jastaǵy jáne 12-15 aılyq balalarǵa júrgiziledi.
Astana qalasynyń Sanepıdqadaǵalaý basshysy, balalardy pnevmokokk juqpasyna qarsy egýdi aldyn ala egýdiń ulttyq kúntizbesine engizý - balalardyń pnevmonııadan shetineýin azaıtýǵa jáne naýqastar sanyn tómendetýge múmkindik beretinine senimdi.
