2014 jyldan bastap alǵashqy medıtsınalyq kómek aıasynda árbir azamatqa aı saıyn 800 teńge qarastyrylady
ASTANA. 11 qyrkúıek. QazAqparat - Aldaǵy jyldan bastap árbir azamatqa tegin medıtsınalyq kómek kórsetý úshin bólinetin qarjy kólemi aıyna 800 teńgege deıin jetedi.
Bul týraly búgin Astanada ótken baspasóz máslıhatynda QR Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Ajar Tóleǵalıeva málim etti.
«2014 jyldan bastap kepildendirilgen alǵashqy medıtsınalyq kómekti qarjylandyrýdyń jańa reformasy aıasynda medıtsınalyq qyzmet úshin árbir azamatqa aı saıyn Úkimet tarapynan 800 teńge bólinedi. Aýyrsa da, aýyrmasa da emhanaǵa tirkelgen árbir adamǵa osy deńgeıde qarjy qarastyrylatyn bolady. Bul turǵyda Qazaqstannyń azamaty jylyna 50 medıtsınalyq qyzmetti alýyna qarajat eseptelgen»,-dedi departament basshysy.
A. Tóleǵalıevanyń sózine qaraǵanda, eger de azamat ózine tıesili qyzmetti almasa, ıaǵnı densaýlyq jaǵdaıynyń jaqsy bolýyna baılanysty emhanaǵa barmasa onda atalǵan qarjy ózge naýqas jandarǵa baǵyttalady.
«Ortasha alǵanda bizde halyqtyń 30-40 paıyzy syrqatty bolady jáne olarǵa atalǵan 50 qyzmetten artyq kómek qajettilik etedi. Eger de saý adam osy qyzmetti qajet etpese, onda bul qarjy ambýlatorlyq deńgeıde ózge syrqattarǵa jumsalady»,-deıdi ol.
