2014 jyl sońyna deıin elimizdiń JІÓ-degi energııa qamtymdylyqty 10 paıyzdan aspaıtyn deńgeıge túsirý kerek
Vıtse-premerdiń aıtýynsha, búgingi tańda atalǵan kórsetkishke qol jetkizýdiń naqty júıeli josparlary ázirlenip qoıǵan. «Biz ózimiz úshin elektr únemdeý boıynsha keshendi sharalar qamtylatyn negizgi sektorlardy anyqtadyq. Eń aldymen bul elimizdegi barlyq elektr energııanyń 70 paıyzyn tutynatyn ónerkásip sektory bolyp otyr. Sosyn turǵyn úı-kommýnaldyq sharýashylyq sektory (barlyq elektr energııanyń 15-20 paıyzyn tutynady) jáne bıýdjettik sektor (mektepter, aýrýhanalar, memlekettik mekemeler t.b.). Osy sektorlar boıynsha biz barlyq qajetti tetikterdi ázirledik. Ony qarasha aıynda Úkimettiń otyrysyna shyǵarýdy josparlap otyrmyz. Al bul baǵyttaǵy negizgi quraldar retinde mynalardy atap ótýge bolady: kásiporyndardaǵy energomenedjment, salyqtyq yntalandyrý, energoqozǵaltqyshtar úshin energııa tıimdiliginiń standarttaryn belgileý, jańa ǵımarattarǵa qurylys normalaryn engizý, qyzatyn elektrli shamdardy satý men shyǵarýǵa satylap tıym salý, memlekettik energetıkalyq reestrdi qalyptastyrý», - dedi Á. Isekeshev. Onyń aıtýynsha, energoúnemdeý máseleleri jóninde jyl sońyna deıin naqty zańnamalyq normalar qamtylýy shart. Solaı bolǵan jaǵdaıda, kelesi jyldan bastap energııa tıimdiligine qatysty josparlanǵan sharalar birtindep júzege asa bastaıdy.
«Bul rette ónerkásiptik sektorǵa keletin bolsaq, bastapqy jumystar Qazaqstannyń 15 iri ónerkásiptik kásiporyndary tóńireginde júzege asa bastaıdy. Atalǵan 15 kásiporyn elimizdegi barlyq elektr energııasynyń 30 paıyzyn tutynyp keledi. Egerde, biz osy kásiporyndardyń elektr energııany tutynýyn 15 paıyzǵa deıin tómendete alsaq, onda 4 mlrd. kvt/saǵat jáne 2 mln. tonna kómirdi jyl saıyn únemdeıtin edik. Basqasha aıtsaq, bul jyl saıyn 40 mlrd. teńgeni únemdegendi bildiredi. Al turǵyn úı-kommýnaldyq sharýashylyq aıasynda jáne bıýdjettik nysandar sektorymen jumys barysynda respýblıkamyzdaǵy 2230 ǵımarat, 5812 turǵyn úı jáne 1100 shaqyrym jylý jelileri energııa tıimdiligine qatysty sharalarmen qamtylady. Eger biz osy nysandardan elektr jáne jylý energııasynyń tutyný kórsetkishin 20 paıyzǵa tómendete alsaq, onda jylyna 1,3 mlrd. kvt/saǵat jáne 8 mln gkal únemdeıtin edik. Bul aqshaǵa shaqqanda 37 mlrd. teńgeni quraıdy. Jalpy belgilengen sharalardy júzege asyrsaq, 9,5 mlrd kvt/saǵat pen 8,2 mln. gkal jylý energııasyn jáne 9 mln. tonna kómirdi shyǵyndamaý esebinen, 100 mlrd. teńgeni de únemdeı alatyn edik», - deıdi Á. Isekeshev.
