2014 jyldan beri zeınetaqy aktıvteri 5 eseden asa ósti – Ulttyq bank

ASTANA. KAZINFORM — BJZQ zeınetaqy aktıvteri 22,3 trln teńge boldy. Bul týraly elordada zeınetaqy aktıvterin ınvestıtsııalaý taqyrybyna arnalǵan baspasóz máslıhatynda Ulttyq bank Monetarlyq operatsııalar departamentiniń dırektory Nurjan Tursynhanov málim etti.

— 2025 jylǵy 1 sáýirdegi jaǵdaı boıynsha Biryńǵaı jınaqtaýshy zeınetaqy qorynyń (BJZQ) zeınetaqy aktıvteri 22,3 trln teńge boldy. Bul kórsetkish 2014 jyldyń sáýirinen, ıaǵnı zeınetaqy aktıvteri BJZQ-da biriktirilgen sátten beri 5 eseden asa ósti. BJZQ zeınetaqy aktıvteriniń qazirgi portfeli mynadaı qurylymnan turady: 60 paıyzy — teńgemen bekitilgen qarajat, 40 paıyzy shetel valıýtasynda. Bul turǵyda valıýtadaǵy aktıvterdiń úlesi aqshalaı eseptegende 17,7 mlrd AQSh dollaryn nemese 9 trln teńge, — dedi Nurjan Tursynhanov.

Onyń aıtýynsha, teńgedegi portfel qurylymynda negizgi ınvestıtsııalar memlekettik baǵaly qaǵazdarǵa tıesili. Onyń kólemi 9,3 trln teńgeni nemese teńgelik portfeldiń 69 paıyzy boldy. Bul baǵaly qaǵazdar Qazaqstan qor naryǵyndaǵy eń senimdi ári ótimdi qarjy tetigi sanalady.

— Sonymen qatar, zeınetaqy aktıvteri kvazımemlekettik sektor sýbektileriniń oblıgatsııalaryna ınvestıtsııalandy, bul shamamen 15%. Munymen qosa, ekinshi deńgeıli bankterdiń oblıgatsııalaryna da ınvestıtsııalanady, ıaǵnı 5% shamasynda boldy. Aıta ketý kerek, BJZQ zeınetaqy aktıvteri tek naryqtyq mólsherlemelermen ınvestıtsııalanady. Mundaı tásil zeınetaqy aktıvteriniń turaqty ınvestıtsııalyq tabys ákelýine, sondaı-aq eldiń áleýmettik-ekonomıkalyq damýyna da yqpal etedi. 2016 jyldan beri zeınetaqy aktıvterindegi valıýtalyq úles kezeń-kezeńimen 17%-dan 40%-ǵa deıin ulǵaıdy. Valıýtalyq aktıvterdiń bolýy ınvestıtsııalaýdyń geografııasyn keńeıtip, qarjy quraldarynyń túr-túrin paıdalanýǵa, sondaı-aq ınvestıtsııalyq portfeldiń sapasy men ótimdiligin arttyrýǵa múmkindik beredi, — dedi UB ókili.

Eske salsaq, jaqynda eldegi zeınetaqynyń ortasha mólsheri qaı deńgeıde ekenin jazǵan edik.