2014-2015 oqý jylynda elordalyq oqýshylar halyqaralyq olımpıadalar men ǵylymı saıystarda 150 medal jeńip aldy (FOTO)
ASTANA. QazAqparat - Búgin Astana qalalyq bilim basqarmasynyń basshysy Elmıra Suhanberdıeva elordanyń daryndy mektep oqýshylarymen kezdesti.
«Astana qalasynda daryndy balalardy anyqtaý, qoldaý jáne damytý baǵytynda maqsatty jumystar júrgizilýde. Bizdiń jumysymyzdyń ereksheligi sońǵy nátıjege baǵyttalǵan. Elorda mektepteri oqýshylarynyń barlyq deńgeıdegi olımpıadalarda, ǵylymı jáne ıntellektýaldy saıystarda jetken jetistikteri sonyń dáleli», - dedi kezdesý barysynda E.Suhanberdıeva.
Onyń atap ótýinshe, 2014-2015 oqý jylynda elordalyq oqýshylar halyqaralyq olımpıadalar men ǵylymı saıystarda jalpy bilim beretin pánder boıynsha 150 medal jeńip alǵan. Olardyń 26-sy - altyn, 34-i - kúmis, 90-y qola medal. Ótken jyldyń qazan aıynda 57 oqýshydan quralǵan elordalyq komanda Almatyda ótken respýblıkalyq ǵylymı jobalar baıqaýyna qatysyp, 2 altyn, 4 kúmis, 15 qola medal jeńip alǵan. Al Atyraý men Oralda ótken gýmanıtarlyq jáne tehnıkalyq pánder boıynsha respýblıkalyq olımpıadaǵa 78 oqýshy qatysty. 11 oqýshy 1-shi, 15 oqýshy 2-shi, 18 oqýshy 3-shi oryndy ıelense, 10 oqýshy maqtaý qaǵazymen marapattaldy.
«Atalǵan jetistikterdiń barlyǵy elorda oqýshylaryna 8-shi ret «Úzdik komanda-2015» ataǵyn alýyna múmkindik berdi», - dedi ol.
10-11 synyptyń 42 oqýshysy qatysqan kezdesý suraq-jaýap túrinde órbidi.
