2014-2015 oqý jylyna 34 myńnan astam bilim granty bólindi - QR BǴM
ASTANA. QazAqparat - Memleket 2014-2015 oqý jylyna joǵary bilim alýǵa 34 myńnan astam grant bóldi. Bul týraly "QazAqparat" tilshisine QR Bilim jáne ǵylym mınıstrliginiń baspasóz qyzmeti habarlady.
"Jalpy 2014-2015 oqý jylynda joǵary bilimdi mamandardy daıarlaýǵa arnalǵan memlekettik tapsyrysqa 34 115 bilim granty bólindi", - deıdi mınıstrlik agenttiktiń resmı saýalyna qaıyrǵan jaýabynda.
QR BǴM aqparaty boıynsha, bıylǵy jyly memlekettik tapsyrys Qazaqstan ekonomıkasynyń suranysyna meılinshe saı jasaldy.
"Negizgi kóńil eldiń áleýmettik-ekonomıkalyq damýynyń strategııalyq basymdyqtaryna aýdaryldy. Bul, eń aldymen, Memleket basshysy jarııa etken údemeli ındýstrııalandyrý baǵyty. Bilim berý salasyn jańǵyrtý maqsatynda memlekettik tapsyrystyń ishinde pedagogıkalyq mamandardy daıarlaýǵa da úlken oryn berilgen. Sonymen qatar eldiń agroónerkásiptik kesheni de nazardan tys qalǵan joq", - dep atap ótti vedomstvodaǵylar.
Mınıstrliktiń málimeti boıynsha, 12 myń oryn tehnıkalyq ǵylym jáne tehnologııalyq mamandyqtarǵa, 5 myńnan astam grant - pedagogıkalyq mamandyqtarǵa, 2650 oryn aýyl sharýashylyq jáne veterınarlyq salalarǵa bólinip otyr.
"Bıylǵy memlekettik tapsyrystyń úlestirilýi eńbek naryǵyna arnalǵan joǵary bilikti mamandyqtardyń tıimdi qurylymyn jasaqtaýǵa septigin tıgizedi", - dep esepteıdi mınıstrlikte.
