2013 jyly JІÓ ósimi 6 paıyzǵa boljanady - B. Saǵyntaev
ASTANA. 11 qyrkúıek. QazAqparat -2013 jyly elimizdegi naqty jalpy ishki ónimniń ósimi 6 paıyzdy, 2014 jyly - 6,1, 2015 jyly - 7,6 paıyzdy quraıtyn bolady.
Bul týraly búgin Parlament Májilisinde «2013-2015 jyldarǵa arnalǵan respýblıkalyq bıýdjet týraly» zań jobasyn tanystyrý barysynda Ekonomıkalyq damý jáne saýda mınıstri Baqytjan Saǵyntaev málim etti.
Mınıstrdiń aıtýynsha, 2017 jylǵa deıingi boljam boıynsha ekonomıkanyń ortasha merzimdegi ósimi 7 paıyzda qamtylatyn bolady. «Jalpy ishki ónimniń negizgi ósimi jylyna orta eseppen 6,5-6,8 paıyz qarqynmen ósetin ishki suranysty keńeıtý, sondaı-aq qazaqstandyq ónimge degen syrtqy suranystyń saqtalýynan qalyptasady. Nomınaldy ishki jalpy ónim 2013 jyly 36,6 trln. teńgeden, 2014 jyly 65,3 trln. teńgege deıin ósedi dep boljanýda. Jan basyna shaqqanda JІÓ 2017 jyly - 14 myńnan astam dollardy quraıtyn bolady. Bul kórsetkish 2017 jylǵa qaraı 24 myń dollarǵa deıin jetedi», - dedi B. Saǵyntaev.
Onyń aıtýynsha, ortasha alǵanda ónerkásiptegi jyldyq ósim qarqyny 5,5 paıyzdy, onyń ishinde óńdeý ónerkásibi 7,1 paıyzdy quraıtyn bolady. Qyzmetter salasy turaqty damıdy. Eksport 2013 jyly 96 mlrd. dollardan, 2017 jyly 116,7 mlrd. dollarǵa deıin, ımport 2013 jyly 56,3 mlrd. dollardan, 2017 jyly 92,3 mlrd. dollarǵa deıin ulǵaıatyny boljanady.
