2013 jyly respýblıkalyq mańyzy bar 3 500 shaqyrym jol jóndeledi
ASTANA. 30 mamyr. QazAqparat - QR Kólik jáne kommýnıkatsııa mınıstrligi Avtomobıl joldary komıtetiniń aqparatyna sáıkes,
aǵymdaǵy jyly respýblıkalyq mańyzy bar 3 500 shaqyrym jol jóndeý jumystarymen (qurylys jáne qaıta salý jumystarymen - 888 shaqyrym, ortasha jáne kúrdeli jóndeý jumystarymen - 1 112 shaqyrym) qamtylady, onyń ishinde 2 000 shaqyrym joldy qurylys maýsymynyń sońyna deıin paıdalanýǵa berý josparlanǵan.
Jyl basynan beri «Batys Eýropa - Batys Qytaı» halyqaralyq dáliziniń 220 shaqyrym joly salynǵan bolsa, aǵymdaǵy jyly kezekti 806 shaqyrymy iske qosylady.
«Batys Eýropa - Batys Qytaı» halyqaralyq dálizi qurylysynyń jobasyn júzege asyrýǵa kiriskeli beri 915 shaqyrym jol salynǵanyn esterińizge salyp ótemiz. Qazirgi ýaqytta 1 233 shaqyrym jolda qurylys jumystary júrgizilýde, al jyldyń sońyna qaraı 383 shaqyrym jolda qurylys jumystary bastalady. Jobany aıaqtaý 2015 jylǵa josparlanǵan.
Memleket basshysynyń tapsyrmasyna sáıkes, 2013 jylǵy shildede Astana - Qaraǵandy, Almaty - Qapshaǵaı, Astana - Pavlodar jobasyn bastaý josparlanyp otyr. «Ortalyq - Ońtústik» avtokólik baǵytyn damytý aıasynda bolashaqta Qaraǵandydan Almatyǵa deıin Balqash kóli ústinen kópir salý múmkindigin qarastyra otyryp, jol salý kózdelýde. Bul baǵyttaǵy jumystardy tolyǵymen 2019 jyly aıaqtaý josparlanǵan.
2020 jylǵa deıin «Astana - Óskemen» jolyn qaıta jóndeýdi aıaqtaý josparlanyp otyr. Bul baǵytta uzyndyǵy 155 shaqyrymdy quraıtyn Pavlodar - Qalbataý ýchaskesinde de qurylys jumystary jalǵasady. Onyń aıaqtalýy 2020 jylǵa josparlanǵan.
Budan basqa, aǵymdaǵy jyly Shyǵys Qazaqstan oblysyndaǵy Taskesken - Baqty avtojolynyń 40 shaqyrym ýchaskesinde qozǵalys qarqyndylyǵy men júktemege sáıkes kelmegen joldyń kóp bóligindegi jol jamylǵysyn qaıta salyp, ony qoldanysqa berý josparda bar.
Reseı Federatsııasynyń shekarasy - Oral - Aqtóbe ýchaskesin, Aqtóbe jáne Batys Qazaqstan oblystary boıynsha 65 shaqyrym joldy qaıta jóndeýdi aıaqtaý boıynsha jumystar júrgizilýde. Joldyń bul ýchaskesi 2014 jyly paıdalanymǵa berilgen soń Oraldan Aqtóbe qalasyna deıin avtokólikpen qatynaý aıtarlyqtaı jeńildeı túspek.
Azııa damý bankinen jáne respýblıkalyq bıýdjetten qarajat tartý esebinen Beıneýden Shetpege (298 shaqyrym) deıingi joldy qaıta salý jumystary da jalǵasýda. Sondaı-aq, Shetpe - Aqtaý ýchaskesin qaıta salýǵa Azııa damý bankinen qaryz alý jónindegi kelisimge qol qoıyldy.
Budan bólek, mınıstrlik aıaqtalýy 2014 jylǵa belgilengen Astana - Qostanaı - Chelıabi halyqaralyq dálizin damytý boıynsha da jumystar júrgizýde. Sondaı-aq, aǵymdaǵy jyly Qapshaǵaıdan Taldyqorǵanǵa deıingi aralyqtaǵy tasjoldy tolyǵymen jóndeý jumystarymen qamtý josparlanǵan.
Munyń syrtynda «Úlken Almaty aınalma tas joly» jobasyn iske asyrý boıynsha jumystar júrgizilýde. Qurylys jumystaryn bastaý 2014 jylǵa josparlanǵan. Joldyń jalpy uzyndyǵy 65,5 shaqyrymdy quraıdy. Qazirgi ýaqytta tehnıkalyq-ekonomıkalyq negizdemesin óńdeý jáne tenderlik qujattardy ázirleý jumystary júrgizilýde.
Sonymen qatar, 2020 jylǵa deıin Qazaqstanda EKSPO-2017 sharasyna daıyndyq aıasynda 4 jobany júzege asyrýdy qosa eseptegende barlyq halyqaralyq kólik dálizderi jelisiniń rekonstrýktsııasyn aıaqtaý josparlanyp otyr. Bular joǵaryda atalǵan Astana - Qaraǵandy, Astana - Pavlodar, sondaı-aq Astana qalasynyń ońtústik - batys aınalymy men Şýchınsk - Zerendi joldary. Sondaı-aq, 2020 jylǵa deıin jalpy qoldanystaǵy 38 myń shaqyrym jolǵa jóndeý jumystaryn júrgizý josparlanǵan.
