2013 jyly qazanda Almatyda Boks akademııasy ashylady
ASTANA. 18 maýsym. QazAqparat - 2013 jyly Qazaqstanda boks akademııasy ashylady. Bul týraly Lozannede ótken AIBA-nyń "Boks akademııasy" jobasyna arnalǵan jıynynda atalǵan uıymnyń atqarýshy dırektory Ho Kım málim etti,
dep habarlaıdy BNews.kz tilshisi Shveıtsarııadan.
"Qazaqstandyq boks akademııasynyń ashylýy 2013 jylǵy bokstan álem chempıonatynyń bastalýy qarsańynda qazan aıynyń alǵashqy kúnderiniń birinde ótedi", - dedi Ho Kım.
Onyń atap ótýinshe, Almatyda boı kóteretin akademııa ǵımaratynyń qurylysy belgilengen keste boıynsha júrgizilýde. Aıaqtalýy 2013 jyldyń mamyryna josparlanǵan.
Sonymen qatar atqarýshy dırektordyń sózine qaraǵanda, AIBA árbir qurlyqqa bir-birden 5 akademııa salýdy kózdeýde. Qalǵan akademııalardyń eskızdik nusqasyn bekitý aǵymdaǵy jyldyń sońynda júzege asyrylady.
Esterińizge sala keteıik, Almatyda Boks akademııasynyń qurylysy bastalatyndyǵyn ótken jyly elordada QR Boks federatsııasynyń prezıdenti Tımýr Qulybaev málim etken bolatyn. Onyń atap ótýinshe, 1-2 jyldyń ishinde Almatyda shańyraq kóteretin Boks akademııasy búkil dúnıejúziniń tóreshileri men jattyqtyrýshylarynyń qaıtadan biliktilikten ótý ornyna aınalmaq.
«Biz osy jyly qurylysty bastaımyz. Qarjy jáne demeýshiler taptyq. Meniń oıymsha, ol bizdiń jattyqtyrýshylar men tóreshilerdiń óz deńgeılerin kóteretin nysanyna aınalady. Ekinshiden, is júzindegi álemniń barlyq sporttyq fýnktsıonerleri Almatyǵa turaqty túrde keletin bolady ári bizge olardy jetistikterimizben, eldegi bokstyń damý jaǵdaıymen tanystyrýǵa múmkindik alamyz», - degen edi T.Qulybaev.
