2013 jyly Qazaqstanda djıý-djıtsýdan álem chempıonaty ótýi múmkin - Búkiljapondyq djıý-djıtsý federatsııasynyń basshysy A.Kýnın
ASTANA. 25 naýryz. QazAqparat /Qanat Qulshymanov/ - 2013 jyly Qazaqstanda djıý-djıtsýdan álem chempıonaty ótýi múmkin.
Bul týraly Astanada ótken baspasóz máslıhaty kezinde Búkiljapondyq djıý-djıtsý federatsııasynyń basshysy, 10-dan ıegeri Alekseı Kýnın málim etti.
«Biz aqyldastyq, Qazaqstanǵa eki jyldan keıin djıý-djıtsýdan álem chempıonatyn ótkizý týraly usynys aıtý oıymyzda bar. Bul kúrdeli másele, sondyqtan biz qazir kelissózder ótkizip, Qazaqstannyń osy chempıonatty ótkizý múmkindikterin qarap jatyrmyz», - dedi A.Kýnın.
Onyń pikirinshe, respýblıkada djıý-djıtsý sportymen aınalysýǵa múmkindigi men nıeti bar jastar shoǵyrlanǵan. «Bizdiń qyzyqty oılarymyz, qyzyqty josparlarymyz bar. Men Úkimet, Týrızm jáne sport mınıstrligi, «Nur Otan» halyqtyq-demokratııalyq partııasy bizge qoldaý tanytady dep senemin», - degen oıyn jetkizdi A.Kýnın.
«Biz ásirese jastardyń osy sport túrine degen qyzyǵýshylyǵy oıanýyn, árbir mektep, árbir ýnıversıtette klýbtar ashylǵanyn qalaımyz. Bul shyndyqqa aınalady, tek jaqsy baza qalyptastyrý kerek, al jattyqtyrýshylar quramy bul elde bar», - dep atap ótti federatsııa tóraǵasy.
A.Kýnınniń oıynsha, Qazaqstan sport áleminde aldyńǵy qatarǵa shyǵyp keledi, elimizdiń eýrazııalyq jaýyngerlik óner ortalyǵyna aınalýy úshin zor bolashaǵy bar.
«Biz Qazaqstannyń sporttyq jetistikterine, saıası jaǵdaıyna qaraı otyryp, bul jerde djıý-djıtsý, karate jáne dzıýdo bazasy negizinde Ulttyq jattyqtyrý ortalyǵyn qurýǵa múmkindik bar ekenin kórip otyrmyz», - dep atap ótti ol.
