2013 jylǵy turǵyn úı qurylysy boıynsha 6,8 mln. sharshy metr deńgeıindegi jospar oryndalýy tıis - QR Premer-Mınıstri
ASTANA. 2 tamyz. QazAqparat - Búgin Úkimet úıinde QR Premer-Mınıstri Serik Ahmetov «Qoljetimdi turǵyn úı - 2020» baǵdarlamasyn júzege asyrý, qurylys ındýstrııasyn damytý jáne egin oraǵyn sapaly ótkizý máseleleri boıynsha selektorlyq rejımde keńes ótkizdi, dep habarlaıdy primeminister.kz.
«Qoljetimdi turǵyn úı - 2020» baǵdarlamasyn júzege asyrý barysy týraly QR óńirlik damý vıtse-mınıstri Serik Nokın baıandady.
«Ústimizdegi jyldyń 6 aıynda barlyq qarjylandyrý kózderi boıynsha 3 mln. sharshy metr turǵyn úı paıdalanýǵa berildi, bul jyldyq jospardyń 46%. Jalpy berilgen turǵyn úıdiń 60% nemese 1,8 mln. sharshy metri ITQ úlesine tıedi», - dedi S.Nokın.
Onyń sózine qaraǵanda kezekte turǵandar úshin jaldamaly turǵyn úı qurylysyna 2013 jyly 17,5 mlrd. teńge qarastyrylǵan.
«Eger buryn jylyna 2-2,5 myń páter salynsa, bıyl jalpy aýmaǵy 285 myń. sharshy metr kólemindegi 4 myń páter turǵyzý josparlanýda.
Naqtysynda jarty jyldyń qorytyndysy boıynsha paıdalaný aýmaǵy 38,4 myń. sharshy metr 632 jaldamaly páter paıdalanýǵa berildi, bul jyldyq jospardyń 13%. Ákimdikterdiń málimetteri boıynsha úshinshi jáne tórtinshi toqsandarda páterlerdiń negizgi bóligin paıdalanýǵa berý kózdelip otyr», - dedi S.Nokın.
Jas otbasylar úshin jaldamaly turǵyn úı qurylysyna 2013 jyly 10 mlrd. teńge qarastyrylǵan. 117 myń. sharshy metr qurylys salý josparlanǵan, 6 aıda 19,3 myń sharshy metr aýmaqty quraıtyn 314 páter salyndy. Bul josparlanǵan qurylystyń 17% quraıdy. Munda da páterlerdiń negizgi bóligin paıdalanýǵa berý osy jyldyń úshinshi jáne tórtinshi toqsandaryna josparlanyp otyr.
Turǵyn úı qurylys jınaq jelisi boıynsha 2013 jyly 451,5 myń sharshy metr turǵyn úıdi paıdalanýǵa berý josparlanýda. Eseptik kezeńde 80 myń sharshy metr nemese 1200 páter turǵyzyldy. Bul maqsatqa aǵymdaǵy jyly 30,1 mlrd. teńge qarastyrylǵan.
«2013 jyly baǵdarlamamen 6,6 mln. sharshy metr kólemde turǵyn úıdi paıdalanýǵa berý kózdelgen. Alaıda, biz bul mejeni ótken jylǵy 6,8 mln. sharshy metr deńgeıden túsirmeý múmkindigi bar dep esepteımiz», - dedi vıtse-mınıstr.
Sondaı-aq, bul máseleler boıynsha «Turǵyn úı qurylys banki» AQ basqarma tóraıymy N.Naýryzbaeva, «QTQK» AQ basshysy K.Aıtekenov, «Samuryq-Qazyna» UÁQ» AQ basqarma tóraǵasynyń orynbasary D.Erdebaı, sondaı-aq birqatar oblystardyń ákimderi sóıledi. Qurylys ındýstrııasyn damytý máseleleri boıynsha QR Indýstrııa jáne jańa tehnologııalar birinshi vıtse-mınıstri A.Raý baıandady.
«2013 jylǵy 6,8 mln. sharshy metr deńgeıindegi jospar oryndalýy tıis. Bul úshin bizde barlyq resýrstar men múmkindikter bar»,- dep júktedi S.Ahmetov.
Osyǵan oraı, Premer-Mınıstr ÓDM-ge barlyq baǵyttar boıynsha Baǵdarlamanyń júzege asyrylýyna turaqty monıtorıng pen qatań baqylaý jasaýdy, oblystar, Astana men Almaty qalalary ákimdikterine osy aıdyń sońyna deıin bólingen qarjyny ıgerý boıynsha sharalar qabyldaýdy tapsyrdy.
