2013 jylǵy Qazaqstan boks federatsııasy kýbogyna qatysatyn komandalar arasynda jerebe tartyldy
ASTANA. 28 mamyr. QazAqparat - Búgin Astanada 2013 jylǵy Qazaqstan boks federatsııasy kýbogyna qatysatyn komandalar arasynda jerebe tartý rásimi boldy.
Oǵan QR bokstan memlekettik jattyqtyrýshysy Bolat Abdrahmanov, HHH Jazǵy olımpıada chempıony Serik Sápıev jáne basqa da boks salasynyń mamandary qatysty.
Jerebe nátıjesi boıynsha, chempıonatqa elimizdiń oblystary 4 dıvızıon boıynsha qatysady. Batys dıvızıonynda Mańǵystaý men Atyraý oblystary, Batys Qazaqstan men Aqtóbe oblystary kúsh synasady. Jarystar Aqtóbe qalasynda ótedi. Al Soltústik dıvızıonynda Qaraǵandy men Soltústik Qazaqstan oblystary, Aqmola men Qostanaı oblystary qolǵap túıistiredi. Kezdesýler Qostanaı qalasynda ótedi.
Ońtústik dıvızıonynda Almaty qalasy men Jambyl oblysy, Qyzylorda men Ońtústik Qazaqstan oblystary baq synaıdy. Bul kezdesýler jerebe boıynsha Shymkent qalasynda ótetin boldy. Al Shyǵys dıvızıonynda Shyǵys Qazaqstan men Almaty oblysy jáne Pavlodar oblysy men Astana qalasy komandalary Astanada saıysady.
Jartylaı fınalda osy dıvızıondardan úzdik shyqqan komandalar ózara kúsh synasady.
«Qazaqstan boks federatsııasynyń osy maýsymy jańa sýdıalyq jáne tehnıkalyq erejeler boıynsha, qorǵanys shlemderinsiz ótedi. Sondaı-aq týrnırdiń reglamentine de ózgerister engizildi. Birinshiden, týrnırdiń kezeńderiniń sany 3-ke deıin azaıdy. Ekinshiden, shırek fınal sheńber boıynsha ótedi, ıaǵnı barlyq komandalar 18-28 shilde aralyǵynda úsh-úshten kezdesý ótkizedi. Dıvızıon jeńimpazy jınaǵan upaı sany boıynsha anyqtalady», - dep atap ótti B. Abdrahmanov.
Jartylaı fınaldyq básekeler Astana qalasynda 14 jeltoqsanda, al fınal 15 jeltoqsanda ótedi.
