2013 jylǵy 1 qańtardan bastap Reseıde qoǵamdyq televıdenıe jumys jasaı bastaıdy
ASTANA. 17 sáýir. QazAqparat - RF Prezıdenti Dmıtrıı Medvedev 2013 jylǵy 1 qańtardan jumys isteı bastaıtyn qoǵamdyq televıdenıe qurý týraly Jarlyqqa qol qoıdy, dep habarlady ITAR-TASS.
Bul týraly memleket basshysy «ashyq úkimet» formatyndaǵy pikirsaıys barysynda mlimdedi.
Jarlyqta alǵashqy kezeńde Qoǵamdyq televıdenıe nesıelik jeli esebinen, keıinnen endaýment arqyly qarjylandyrylatyny kózdelgen.
Sondaı-aq qoǵamdyq televıdenıe boıynsha keńes bekitiledi, onyń quramyna ártúrli qoǵamdyq kúshter tartylmaq. Qujatta Qoǵamdyq televıdenıe keńesiniń quramyna memlekettik qyzmetkerlerdiń engizilýine tyıym salynatyny kórsetilgen.
Qoǵamdyq televıdenıeni qurýdyń qajettigi týraly D.Medvedev 2011 jylǵy jeltoqsanda Federaldyq jınalysqa joldaýynda málim etken bolatyn. Osy joba boıynsha baılanys jáne buqaralyq kommýnıkatsııalar mınıstrligi, sondaı-aq Prezıdent janyndaǵy adam quqyqtary jónindegi komıssııa óz usynystaryn ázirledi.
Qoǵamdyq televıdenıe adal jáne halyqqa súıikti bolýy tıis, dep paıymdaıdy Memlekettik dýmanyń vıtse-spıkeri Lıýdmıla Shvetsova. «Qoǵamdyq televıdenıe adamdy kemsitpeı, qaıta ardaqtaı bilýi, onyń qadir-qasıetin, zııatkerligin, rýhanı, mádenı kózqarastaryn kótermeleýmen qatar, basqa ulttar men dinderge tózimdilikke, tarıhqa, dástúrlerge súıispenshilikke, Otandy súıýge tárbıeleýi tıis», - dedi ol ITAR-TASS tilshisine bergen suhbatynda.
