2013 jyldyń jeti aıynda Astanada 3 617 páter qoldanysqa berildi
ASTANA. 15 tamyz. QazAqparat - 2013 jyldyń qańtar-shilde aılarynda Astanada turǵyn úı qurylysyna baǵyttalǵan ınvestıtsııalar kólemi 2012 jyldyń sáıkes merzimimen salystyrǵanda 195 paıyzdy qurady.
Bul týraly elordalyq Statıstıka departamentinen habarlady.
Jalpy, negizgi kapıtalǵa tartylǵan ınvestıtsııada turǵyn úı qurylysynda ıgerilgen qarjynyń úlesi 19,8 paıyz boldy.
Elordanyń resmı saıtynyń jazýynsha, barlyq qarjylandyrý kózderiniń esebinen jalpy aýdany 388 195 sharshy metrdi quraıtyn 3617 páter paıdalanýǵa berildi. Bul 2012 jylǵy qańtar-shilde aılarymen salystyrǵanda 49,6 paıyzǵa tómen. Jeke turǵyn úı salýshylar jalpy aýdany 49 567 sharshy metrlik turǵyn úı saldy. Jalpy tapsyrylǵan úılerdiń ishinde jeke turǵyn úı salýshylardyń úlesi ótken jyldyń alǵashqy jeti aıyndaǵy 4,1 paıyzǵa qaraǵanda 12,8 paıyzdy qurady.
«2013 jylǵy qańtar-shilde aılarynda elordada turǵyn úı salýdyń ortasha quny is júzinde jalpy aýdannyń 1 sharshy metri úshin 86,6 myń teńgeni (2012 jylǵy qańtar-shildede 90,2 myń teńge), al turǵyn úıdiń paıdaly aýdanyn salýdyń ortasha quny is júzinde 1 sharshy metri úshin 113,0 myń teńgeni (2012 jylǵy qańtar-shildede 122,2 myń teńge), sonyń ishinde jeke turǵyn úı qurylysshylary salǵan úılerde 53,7 myń teńgeni qurady», - delingen aqparatta.
