2013 jyldyń qańtarynan avtomobıldi tehnıkalyq baıqaýdan ótkizý úderisinde mindetti beınebaqylaý júrgiziledi - KKM
ASTANA. 19 jeltoqsan. QazAqparat - 2013 jyldyń qańtarynan avtomobıldi tehnıkalyq baıqaýdan ótkizý úderisinde mindetti beınebaqylaý júrgiziletin bolady.
Bul týraly QR Kólik jáne kommýnıkatsııa mınıstrligi taratqan aqparatta aıtylǵan.
«Tehnıkalyq baıqaýdan «syrttaı» ótý múmkindigin boldyrmaý úshin TB uıymdastyrý jáne ótkizý Erejesine ózgertýler engizildi: buryn engizilgen mindetti foto tirkeýden bólek, avtomobıldi tehnıkalyq baıqaýdan ótkizý protsesine mindetti beınebaqylaý júrgizý engizildi. 2013 jyldyń qańtarynan bastap atalǵan talaptar zańdy kúshine enedi jáne tehnıkalyq baıqaý ótkizýde mindetti bolyp tabylady», - delingen vedomstvo aqparatynda.
Jalpy búgingi tańǵa 619 statsıonarlyq jáne mobıldik jeliden turatyn 297 tehnıkalyq baqylaý ortalyǵynyń jumysy uıymdastyrylǵan. Aǵymdaǵy jyldyń basynan beri respýblıka boıynsha 2012 jyly tehnıkalyq baıqaýdan ótýi tıis 2 mln 155 myń avtokólik quralynyń 1 mln 478 myńy ótken. TBO tarapynan zańsyz áreketterge jol bermeý maqsatynda avtokólikti paıdalaný qaýipsizdigine tikeleı áser etpeıtin vızýaldy baqylaý parametrleriniń tizimi 51-den 39-ǵa deıin qysqartyldy. Sonymen birge tehnıkalyq baıqaýdan ótý úshin saqtandyrý polısin usyný mindeti de alynyp tastaldy.
«Tehnıkalyq baıqaýdan ótýdiń ashyqtyǵyn qamtamasyz etý maqsatynda barlyq TBO-lardy biriktirgen «Tehnıkalyq baıqaý» biryńǵaı aqparattyq júıesi engizildi. Qazirgi ýaqytta atalǵan júıe testtik tártipte jumys istep tur. Bul júıeniń kómegimen tehnıkalyq baıqaýdan ótkeni týraly 1102 kýáliktiń jalǵan berilgeni anyqtaldy», - delingen habarlamada.
