2013 jyldyń І toqsanynda «Tobyl-Kókshetaý-Astana» gaz qubyrynyń qurylysy bastalady
ASTANA. 20 shilde. QazAqparat - Qazaqstannyń ortalyq óńirlerine gaz jetkizýdi qamtamasyz etý maqsatynda «Tobyl-Kókshetaý-Astana» gaz qubyryn tartý jobasy iske asyryla bastady, dep habarlady Munaı jáne gaz mınıstrliginiń baspasóz qyzmetinen pm.kz saıtyna.
«Elimizdiń ortalyq óńirlerine jáne Astana qalasyna «kógildir otynnyń» jetkizilýin qamtamasyz etetin «Tobyl-Kókshetaý-Astana» magıstraldyq gaz qubyrynyń qurylysy shamamen 2013 jyldyń І toqsanynyń sońyna qaraı bastalady», - delingen mınıstrliktiń habarlamasynda.
Qazir daıyndyq jáne uıymdastyrý jumystary júrgizilýde. Sonymen qatar Astana men Kókshetaý úshin qajetti gaz taratý stansalarynyń qurylysyn bastaý josparlanyp otyr.
«Magıstraldyq qubyrdyń boıyndaǵy eldi mekenderdi «kógildir otynmen» qamtamasyz etý maqsatynda gaz taratý jelilerin damytý isi óńirlik jergilikti atqarýshy organdar ázirleıtin óńirlik damý baǵdarlamalaryna nemese oblystardy gazdandyrý baǵdarlamalaryna baılanysty bolady», - dep habarlady mınıstrliktiń baspasóz qyzmetinen.
Gaz qubyrynyń jobalyq qýaty jylyna 6 mlrd. tekshemetrdi shamalaıtyn bolady jáne ol magıstraldyń boıyndaǵy tutynýshylardyń barlyq sanatyn qamtıdy.
Esterińizge sala keteıik, Elbasy N.Á.Nazarbaev «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Joldaýynda elimizdiń ortalyq óńirlerin, onyń ishinde elordany da gazben qamtamasyz etetin qubyr jelisin tartý týraly tapsyrma bergen bolatyn.
