2013 jyldyń 7 aıynda Respýblıkalyq sanıtarııalyq avıatsııa ortalyǵy 1000-nan astam medıtsınalyq qyzmet kórsetti
ASTANA. 9 qyrkúıek. QazAqparat - 2013 jyldyń 7 aıynda Respýblıkalyq sanıtarııalyq avıatsııa ortalyǵynyń utqyr brıgadasy 718 ret ushyrylym jasap, 900-den astam naýqasqa 1000-nan astam medıtsınalyq qyzmet kórsetti. Bul týraly QR Densaýlyq saqtaý mınıstrliginiń baspasóz qyzmetinen habarlady.
Sońǵy jyldary medıtsınalyq kómek kórsetý júıesindegi negizgi basymdyqtar - júkti jáne bosanǵan áıelder, densaýlyqtaryna qaýip tónip turǵan náresteler bolyp tabylatyndyqtan, sanıtarlyq qyzmet kórsetýde de alǵashqy orynda akýsherlik tájirıbedegi jedel jaǵdaı bolyp otyr: atalǵan merzimde mundaı 200 (22%) jaǵdaı tirkelse, odan keıingi oryndarda zaqymdanýlar, onyń ishinde jol-kólik apattary, ýlanýlar men jaralanýlar - 184 (20%), náresteler patologııasy - 170 (18%), qan aınalym júıesi aýrýlary 156 (16%) jáne t.b. alady.
Qazirgi tańda Qazaqstannyń barlyq aýmaqtary medıtsınalyq qurylǵylarmen jabdyqtalǵan sanıtarııalyq avıatsııa qyzmetiniń tasymal quraldarymen tolyq qamtylǵan (5 tik ushaq, 11 ushaq). Oblystyq aýrýhanalar, kóp beıindi aýrýhanalar jáne oblystyq jedel medıtsınalyq járdem stansasy negizinde sanıtarııalyq avıatsııa qyzmeti boıynsha 15 úılestirýshi jumys jasaıdy.
Sanıtarııalyq avıatsııanyń medıtsınalyq qyzmetteri 3 túrde usynylady - sol orynda medıtsınalyq qyzmet kórsetý (onyń ishinde operatsııalar), keńes berý jáne naýqastardy tasymaldaý. Medıtsınalyq qyzmettiń sońǵy túri alǵashqy orynda - 619, sosyn keńes berý tur - 308, al 75 naýqasqa operatsııa jasalǵan.
Sanıtarııalyq avıatsııa qyzmetin damytý maqsatynda 2013 jylǵy maýsymda Respýblıkalyq sanıtarııalyq avıatsııa ortalyǵy men Hemogens pharma health care kompanııasy arasynda yntymaqtastyq týraly memorandýmǵa qol qoıyldy. Bul kompanııa jedel medıtsınalyq kómek kórsetýde jáne Túrkııada sanıtarııalyq avıatsııa nysanynda kómek kórsetýde mol tájirıbege ıe. Yntymaqtastyqtyń negizgi baǵyttary: sanıtarııalyq avıatsııa qyzmetiniń medıtsınalyq jáne basqarma qyzmetkerlerin oqytý boıynsha baǵdarlamalardy uıymdastyrý jáne ótkizý; sanıtarııalyq avıatsııa aýmaǵynda ǵylymı semınarlar, keńester jáne basqa da is-sharalar uıymdastyrý bolyp otyr.
