2013 jyldan bastap «Qoljetimdi baspana-2020» baǵdarlamasynyń jas otbasylar men azamattardyń barlyq sanattaryna arnalǵan jańa baǵyty júzege asyryla bastaıdy - QR Premer-Mınıstri
ASTANA. 28 jeltoqsan. QazAqparat - Búgin QR Premer-Mınıstri Serik Ahmetov «Qoljetimdi baspana-2020» baǵdarlamasynyń ústimizdegi jyly júzege asyrylýynyń qorytyndylary talqylanǵan selektorlyq otyrys ótkizdi, dep habarlaıdy primeminister.kz.
«TQJB» AQ basshysy Nurbıbi Naýryzbaevanyń sózine qaraǵanda, 2012 jyly turǵan úı qurylys jınaǵy tarapynan jergilikti atqarý organdarymen jalpy aýdany 194 myń sharshy metr bolatyn 3 myń páterge 32 nysandyq kelisimge qol qoıylǵan. 2011 jyly qol qoıylǵan kelisimderdi esepke alǵanda, jalpy aýdany 529 myń sharshy metr bolatyn 8021 páterli 110 úıdiń qurylysyn salý kózdelgen.
Ústimizdegi jyly «QIK» AQ tarapynan jeti óńirde, onyń ishinde Astana jáne Almaty qalalarynda 21,4 ga jer alyndy, ol jerlerde 2013 jyly somasy 7,7 mlrd. teńge bolatyn turǵyn úı qurylysy bastalady. Bul týraly «Qazaqstandyq turǵyn úı-qurylys korporatsııasy» AQ basqarmasynyń tóraǵasy Qaırat Áıtekenov habarlady.
«Samuryq-Qazyna» Jyljymaıtyn múlik qory» AQ tarapynan baǵdarlamanyń oryndalýy týraly qor basshysy Bolat Palymbetov málimdedi. Onyń málimetterine qaraǵanda, búgingi kúni qorǵa qurylys salýshylar men jeke ınvestorlardan jalpy kólemi 5 mln sharshy metr bolatyn turǵyn úı qurylysy salasyndaǵy jobalardy birlesip júzege asyrý jóninde 100 astam ótinim túsken.
Indýstrııa jáne jańa tehnologııalar mınıstrliginiń birinshi orynbasary Albert Raýdyń aıtýynsha, respýblıkada búgingi kúni 16 turǵyn úı qurylysy kombınatyn salý jónindegi jumystar júrgizilýde, olardyń 7-i daıyndyqtyń joǵary deńgeıinde. 6 TQK iri paneldi úı qurylysy tehnologııasyn, 4 - qańqalyq-jınaý jáne 6 - aralas tehnologııany qoldanbaq.
Sondaı-aq S.Ahmetov Qostanaı, Pavlodar jáne Almaty oblystary ákimderiniń baǵdarlamanyń júzege asyrylý barysy týraly baıandamalaryn tyńdady.
Májilistiń qorytyndysyn shyǵara kelip, S.Ahmetov oblystardyń jáne Astana, Almaty qalasy ákimderiniń nazaryn baǵdarlamanyń jańa baǵytyna: 2013 jyldan bastap jas otbasylar men azamattardyń barlyq sanattaryna arnalǵan turǵyn úıdi jalgerlik arqyly satyp alý júzege asyryla bastaıtynyna aýdardy. «Barlyq ákimderdiń osy máselege nazar aýdaryp, osy suraq boıynsha májilis ótkizýin suraımyn. Atalǵan másele boıynsha óte úlken jumys bastalady», - dep atap ótti ol.
«Daǵdarys kezinde toqtap qalǵan barlyq eski qurylystardy ákimder óz baqylaýyna alyp, qozǵalysty bastasyn. Barlyq oblystarda osyndaı jobalar bar, jer telimderi qorshaýmen qorshalyp, jyldar boıy ózgerissiz tur. Naqty qurylysshylardy taýyp, Jyljymaıtyn múlik qorymen, «QTQK» AQ-men, Turǵyn úı qurylys bankimen jumys isteýdi bastańdar. Bul olardy alǵa tartýdyń biregeı múmkindigi, onyń ústine barlyq óńirlerde turǵyn úı jetispeıtindigi shyndyq. Memleket basshysy tapsyrma berdi, qoǵam kútip otyr», - dedi S.Ahmetov.
«Astana men Almaty qalalarynyń ákimdikteri turǵyn úı qurylysynyń jyldyq josparyn sózsiz oryndaýlary qajet. QjTKShA buǵan qatań baqylaý jasasyn. Bárińizden de suralady, muny umytpańyzdar», - dep qorytyndylady sózin Premer-Mınıstr.
