2013 jyldan bastap Keden odaǵy aýmaǵynda temir jol kóliginiń birizdendirilgen tarıfteri iske qosylady
ANA. 11 mamyr. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Tarıftik saıasat negizderin qosa alǵanda,
temir jol kóliginiń qyzmetterine qol jetkizýdi retteý týraly kelisimdi ratıfıkatsııalaý týraly» zań jobasyn maquldady.
Kelisimniń maqsaty - Keden odaǵyna qatysýshy árbir memleket aýmaǵy arqyly tasymaldardy júzege asyrý kezinde temir jol kóliginiń qyzmetterine taraptar memleketteriniń tutynýshylarynyń qolaılylyǵyn qamtamasyz etý bolyp tabylady. Budan bólek, zań jobasymen temir jol kóligi uıymdary arasynda ekonomıkalyq múddeler teńgerimin saqtaý, sondaı-aq bir tarap memleketiniń temir jol kóliginiń uıymdary ekinshi tarap memleketiniń temir jol kóligi qyzmetteriniń ishki naryǵyna qol jetkizýine jaǵdaı jasaý sharalary qarastyrylady. «Kelisim aıasynda birqatar ózekti jaǵdaı qarastyrylyp otyr. Birinshiden - tarıfterdi birizdilendirý. Bul rette 2013 jyldyń 1 qańtarynan bastap Keden odaǵy sheńberindegi úsh tarıftiń ornyna birizdendirilgen bir ǵana tarıf qoldanylady. Bul biz úshin asa ońtaıly ótpeli kezeń bolyp tabylady, óıtkeni biz aldaǵy eki jyl ishinde biryńǵaılaý úderisin ótkerip bitetin bolamyz. Búgingi kúni Reseıde tarıfterdiń 90 paıyzy birizdendirildi. Qazaqstandaǵy bul kórsetkish - 40 paıyz bolsa, al Belarýs jaǵy bul sharaǵa áli kirisken joq», - dedi Kólik jáne kommýnıkatsııa vıtse-mınıstri Azat Bekturov.
Onyń aıtýynsha, otandyq júk jóneltýshilerge aýyrtpashylyqty tómendetý maqsatynda árbir tarap tarıftik birizdendirýdi óz betinshe ári satylap júrgizetin bolady. Vıtse-mınıstrdiń sózine qaraǵanda, 2013 jylǵy 1 qańtardan bastap tarap memleketter aýmaǵynan ekinshi tarap memleketiniń aýmaǵy arqyly úshinshi elderge júkterdi tasymaldaý kezinde birizdendirilgen tarıfti qoldanatyn bolady.
Atalǵan kelisim 2010 jyly 9 jeltoqsanda Máskeý qalasynda Qazaqstan, Belarýs, Reseı elderi arasynda jasalǵan bolatyn.
Májilis maquldaǵan zań jobasy Parlament Senatyna jiberiledi.
