2013 jyldan bastap Qazaqstanda apatty jaǵdaıdaǵy úılerdi syryp tastaý jobasy iske asyryla bastaıdy
ASTANA. 5 tamyz. QazAqparat - Qazaqstanda 2013 jyldan bastap Astana qalasynda jáne Mańǵystaý oblysynda apatty jaǵdaıdaǵy úılerdi súrip tastaý jobasy iske asyryla bastady, dep habarlady Qurylys jáne TKSh isteri jónindegi agenttiktiń baspasóz qyzmeti rm.kz. saıtyna bergen málimetinde.
«Eski, apatty jaǵdaıdaǵy úılerdi súrip tastaý jobasyn iske asyrý - 2013 jyldan bastap Astana qalasynda jáne Mańǵystaý oblysynda josparlanyp otyrǵan jańa baǵyt», delingen agenttiktiń habarlamasynda.
Aqparatta apat kórsetilgendeı, apatty jaǵdaıdaǵy úılerdiń turǵyndaryna jańadan salynatyn baspananyń 30% beriledi, al qalǵan 70% memlekettik ınvestıtsııany qaıtarý úshin naryqqa shyǵarylyp satylady.
Astana qalasynyń qalyptasqan bóligin qaıta jańartý jónindegi ilki jobanyń aıasynda memlekettik ınvestıtsııany qaıtarý qaǵıdasyna negizdelgen turǵyn úılerdiń qurylysyn uıymdastyrý jáne apatty úılerdi surip tastaý, «eski» oramdardy keshendi jańartý qarastyrylyp otyr.
Qurylys jáne TKSh isteri jónindegi agenttiktiń aqparaty boıynsha, Astananyń qalyptasqan bóliginde 42 jańartý aýdanyna bólingen jáne jalpy aýdany 588 myń sharshy metrdi quraıtyn 2 978 úıdi qaıta jańartý jáne súrip tastaý qajet. Habarlamada atap kórsetilgendeı, bul úılerdiń basym bóligin, ıaǵnı 2 579 úı ýsadbalyq úıler quraıdy.
Oǵan qosa, súrip tastalatyn eski úılerdiń ornyna josparlanyp otyrǵan baspananyń aýdany 3,1 mln. sharshy metrdi quraıdy. Іlki jobanyń aıasynda 3 - 4 sanattaǵy turǵyn úılerdiń jáne jobany qaıta qarjylandyrý jáne zaemdyq qarjyny bıýdjetke qaıtarý úshin jyljymaıtyn naryqqa shyǵarylyp satylatyn kommertsııalyq turǵyn úıler men keńse jaılardyń qurylysyn salý qarastyrylǵan.
Mańǵystaý oblysynda apatty úılerdi súrip tastaý jobalary Aqtaý jáne Jańaózen qalalarynda iske asyrylmaq.
Aıta ketý kerek, Aqtaýda súrip tastalatyn 14 úıdiń turǵyndary men Jańaózendegi apatty úılerdiń turǵyndaryna baspana salý josparlanýda. Jańa nysandardyń qurylysy úshin jańa aýmaqtar ıgeriledi, sebebi qalanyń ishindegi úıler tyǵyz ornalasqan.
Apatty jaǵdaıdaǵy úılerdi súrip tastaý jobasyn iske asyrý baǵdarlamasyn ázirleýde halyqaralyq tájirıbe eskerildi. Atap aıtqanda, Ankara qalasynyń qalalyq ortany regeneratsııalaý baǵdarlamasyn iske asyrý jobasy paıdalanyldy.
