«2013-2015 jyldarǵa arnalǵan respýblıkalyq bıýdjet týraly» QR zańyna ózgerister men tolyqtyrýlar engizý týraly» zań jobasy maquldandy
Atalǵan, zań jobasyna oraı, Úkimet negizinen makroekonomıkalyq kórsetkishterdiń, elimizdiń áleýmettik-ekonomıkalyq damý kórsetkishteriniń ózgerýine baılanysty aǵymdaǵy jylǵy bıýdjetke ózgerister engizýdi qarastyrady. Sonymen qatar, bıýdjetke kelip túsken qosymsha tabystardy, sondaı-aq osy ýaqytqa deıin bıýdjettiń ıgerilmegen qarajattaryn qaıta bólip paıdalaný kózdeledi. Bul rette ıgerilmegen bıýdjet qarajaty negizinen iri ınvestıtsııalyq jobalarǵa qaraı baǵyttalatyn bolady. Budan bólek, Úkimettiń keńeıtilgen otyrysynda Elbasy júktegen tapsyrmaǵa sáıkes, memlekettik bıýdjettiń tapshylyǵy tómendetiledi.
Ekonomıka jáne bıýdjettik josparlaý mınıstri Erbolat Dosaevtyń aıtýynsha, 2013 jylǵa arnalǵan respýblıkalyq bıýdjetti naqtylaýǵa makroekonomıkalyq kórsetkishterdegi ózgerister men Úkimettiń keńeıtilgen otyrysynda aıtylǵan Memleket basshysynyń tapsyrmalaryn oryndaý negiz bolǵan. Mınıstrdiń sózine qaraǵanda, 2013 jyly eksport kólemi 87 mlrd. 536,7 mln. dollar sheginde bolmaq. Al ımporttyń kólemi 2 661,4 mln. dollarǵa ulǵaıyp, 53 834,0 mln. AQSh dollaryn quraıtyn bolady.
«2013 jylǵa arnalǵan respýblıkalyq bıýdjet túsimderi 5 trln. 242,5 mlrd. teńge kóleminde nemese buǵan deıin bekitilgen bıýdjetpen salystyrǵanda 14,4 mlrd. teńgege ulǵaıatyny anyqtaldy. Kiristerdiń boljamy (transfertterdiń túsimin esepke almaǵanda) 3 trln. 608,3 mlrd. teńge kóleminde baǵalanady nemese bekitilgen kólemnen 20 mlrd. teńgege joǵary. Onyń ishinde salyqtyq túsimder boıynsha 6,9 mlrd, teńge jáne salyqtyq emes túsimder boıynsha - 13,1 mlrd. teńgege ulǵaıady», - deıdi mınıstr E. Dosaev.
Bıýdjet shyǵystary naqtylanǵan bıýdjetpen salystyrǵanda 65 mlrd. 626 mln teńgege artyp, naqty soma 6 trln. 33 mlrd. 373 mln teńge shamasynda bekitiledi.
