2013-2014 jyldary Esil aýdanynda 1 700 oryndyq 3 avtoturaq salynady
ASTANA. 2 aqpan. QazAqparat - Halyqaralyq EKSPO-2017 kórmesin ótkizýge baılanysty elordanyń Esil aýdany aýmaǵynda jalpy syıymdylyǵy 1700 avtomobılge arnalǵan úsh parkıng salý josparlanǵan.
Astana.kz saıtynyń habarlaýynsha, bul týraly aýdan ákimi Sábıla Mustafına eńbek ujymdarymen jáne halyqpen esep berý kezdesýinde málim etti.
Bir 600 oryndyq avtoturaq Orynbor kóshesi boıyndaǵy Joǵarǵy sottyń mańynda ornalasady. Ekinshisi - Qabanbaı batyr dańǵyly boıyndaǵy Kólik mınıstrliginiń ǵımaraty janynan salynady. Onyń da syıymdylyǵy 600 oryndyq. Úshinshi parkıng 500 oryndyq, Dostyq kóshesi boıyndaǵy Qorǵanys mınıstrliginiń ǵımaraty tóńireginen josparlanýda. Ákimniń aıtýynsha, jobalar 2013-2014 jyldary júzege asyrylady.
Sonymen qatar, EKSPO ótkizý úshin kólik ınfraqurylymyn damytý maqsatynda Esil aýdanynda jalpy uzyndyǵy 13,7 shaqyrym kóshelerdi keńeıtip, uzartý jobalary qolǵa alynǵan.
Buǵan qosa, Sábıla Mustafına «Han shatyr» SOO mańynda, Syǵanaq kóshesi boıyndaǵy «Qazaqstan» OKZ men Bas prokýratýra ǵımarattary aýmaǵynda jaıaý júrginshiler ótpelerin salý josparlaryn da baıandady. Onyń aıtýynsha, osy atalǵan jobalar boıynsha kólik qozǵalysyn toqtatpaı, tonnel salý ádisimen qurylystyń jańa tehnologııasy qarastyrylýda.
