2012 jyly jazǵy Olımpıada oıyndarynyń boks sportyndaǵy qurlyqtyq dárejelik irikteý týrnıri Qazaqstanda ótetin boldy
ALMATY. Shildeniń 13-i. QazAqparat /Erlik Erjanuly/ - Shildeniń 9-y kúni Marokkonyń Marrakesh qalasynda Halyqaralyq áýesqoı boks qaýymdastyqtary (AIBA) Atqarý komıtetiniń kezekten tys otyrysy ótti,
dep habarlaıdy QazAqparat QR Áýesqoı boks federatsııasyna silteme jasap.
Bul alqaly jıynǵa Qazaqstan atynan Qazaqstan boks federatsııasynyń atqarýshy dırektory Danııar Ábilǵazın, Astana qalasynyń boks federatsııasynyń prezıdenti Dıas Súleımenov, Qazaqstan boks federatsııasynyń halyqaralyq baılanystar jónindegi úılestirýshisi Azız Qojambetov qatysqan edi. Onda 2012 jylǵy jazǵy Olımpıada oıyndarynyń qurlyqtyq dárejelik irikteý týrnırin ótkizý quqyn beretin baıqaýdyń qorytyndysy shyǵaryldy. Bul týrnırdi ózinde ótkizýge Qazaqstan, Qytaı, Mońǵolııa, Pákistan elderi ótinish bildirgen. Baıqaý qorytyndysynda bul mártebege Qazaqstan ıe boldy.
Jalpy mundaı quqyqty ózge konferentsııalarda buǵan deıin Ázirbaıjan, Marokko, Brazılııa jáne Avstralııa jeńip alǵan bolatyn. Sondaı-aq Astanada ótken «Qazaqstan Prezıdenti kýbogy» ІІ halyqaralyq týrnıri aıasynda ótken Halyqaralyq áýesqoı boks qaýymdastyqtary tóreshileriniń semınary men emtıhandary bolǵan edi. Synaq nátıjesinde qazaqstandyq 5 referı 3 juldyz mártebesin aldy. Olar - Rahymjan Ryspaev, Baqytjan Bekbenbetov, Álisher Altaev, Asııa Amanbaeva jáne Natalııa Tsoı. Mundaı dárejege buǵan deıin Azııada birde-bir referı ıe bolmaǵan. Endi áıelder arasynda 3 juldyzǵa ıe bolǵan qazaqstandyq tóreshilerdiń biri qyrkúıek aıynda Barbadosta ótetin áıelder arasyndaǵy Álem chempıonatynda tórelik jasamaq.
