2012 jyly tuǵyrdan sekirýden Álem kýboginiń bir kezeńi Almaty qalasynyń tuǵyrdan sekirý kesheninde ótedi - qala ákimi
ALMATY. 1 aqpan. QazAqparat /Názıra Eleýhan/ -2012 jyly tuǵyrdan sekirýden Álem kýboginiń bir kezeńi Almaty qalasyndaǵy Shańǵymen tuǵyrdan sekiretin halyqaralyq keshende ótedi. Bul týraly Almatyda elimizdiń 2020 jylǵa deıingi strategııalyq damý barysyn talqylaýǵa arnalǵan keńeste qala ákimi Ahmetjan Esimov aıtty.
Qala basshysy keńeste qysqy Azııa oıyndary kezinde salynǵan barlyq sport nysandary álemdik sarapshylardyń joǵary baǵasyn alǵandyǵyn atap ótip, «Sporttyq nysandardyń barlyǵy óte qundy ári álemdik standartqa jaýap beredi. Biz joǵary dárejedegi sporttyq sharalardy ótkizýge kúsh jumsaýǵa tıispiz. Bul nysandarda qalalyqtar da jattyǵyp, týrısterdiń qyzyǵýshylyǵy da artatyn bolady», - dedi qala ákimi Ahmetjan Esimov.
Ol bul tarapta Prezıdenttiń óńirlik týrıstik ortalyq retinde Almatyny damytý týraly úlken mindetter qoıyp otyrǵandyǵyn da aıtty.
«Eger biz bul mindetterdi júzege asyra otyryp, 2015 jyly taý shańǵysy trassasyn 500 shaqyrymǵa deıin uzartatyn bolsaq, onda 30 myń jańa jumys orny paıda bolady. Bul úlken kiris ákeletin ekologııalyq jaǵynan tıimdi is, demek osy rette Azıadanyń biz úshin mańyzy óte úlken», - dep qorytyndylady óz sózin keńeste A.Esimov.
