2012 jyly teńiz kólikterinde 9 apattyq jaǵdaı oryn aldy - QR KKM
ASTANA. 29 qarasha. QazAqparat - Qazaqstanda shaǵyn sý kemeleri men teńiz floty sany artty.
Bul týraly Pavlodarda ótken 2012 jylǵy navıgatsııa kezeńindegi keme qatynasynyń qaýipsizdigin qamtamasyz etý sharalarynyń qorytyndysyna arnalǵan jınalysta aıtyldy.
QR Kólik jáne kommýnıkatsııa mınıstrliginiń baspasóz qyzmetinen málim etkendeı, jınalysta shaǵyn kemeler qatarynyń kóbeıýine oraı ákimshilik quqyq buzýshylyqtardyń jáne buzýshylyqtarǵa salynǵan aıyppuldardyń da sany artqany aıtyldy.
Aǵymdaǵy jyly 722 ákimshilik quqyq buzýshylyq anyqtalyp (2011 j. - 666), 4 mln. teńge kóleminde aıyppul salynǵan (2011 j. - 3 mln.51myń).
2012 jyldyń basynan respýblıkada teńiz kóliginde 9 apattyq jaǵdaı, ózen kóliginde 3 kólik oqıǵasy jáne shaǵyn flotta 12 oqıǵa oryn aldy. Shaǵyn sý kemelerindegi apat saldarynan 14 adam qaıtys bolsa (2011 j. - 14), 4 adam iz-tússiz joǵalǵandar qatarynda (2011 j. - 2), 1 adam zardap shekti (2011 j. - 1). Al, teńiz jáne ózen flotynda oryn alǵan apattardan adamdar zardap shekken joq.
Shaǵyn sý kemeleriniń qatysýymen jıi oryn alatyn kóliktik oqıǵalar qatarynda tirkelmegen, tehnıkalyq baıqaýdan ótpegen kemelerdi paıdalaný, kemeni keme júrgizýge ruqsat beretin qujatsyz basqarý, qutqarý quraldarynyń bolmaýy, kemelerdi túngi mezgilde júrgizý, sonymen birge qarapaıym qaýipsizdik sharalaryn saqtamaý sekildi buzýshylyqtar jıi kezdesedi.
QR Kólik jáne kommýnıkatsııa mınıstrligi Kóliktik baqylaý komıtetiniń Sý kóligi basqarmasynyń bastyǵy Arlan Zakarıanovtyń aıtýynsha, navıgatsııa maýsymy aıaqtalǵanymen, sý kólikteriniń qatysýymen bolatyn apattardyń oryn alýy múmkindigi saqtalady. Osyǵan oraı, aımaqtyq kóliktik baqylaý organdaryna navıgatsııa aralyq maýsym - kúz jáne kóktem mezgilderinde sý betin muz jamylǵylarynan tolyq tazartpaıynsha, shaǵyn kemelerdiń qoldanylýyna jol bermeý maqsatynda sý qoımalaryna baqylaý júrgizýdi kúsheıtý tapsyryldy. Sonymen birge, qysqy turaqqa qoıylǵan kemelerdi tekserip, olardyń navıgatsııalyq jabdyqtarynyń jaǵdaıyna monıtorıng júrgizý tapsyryldy.
Jınalysqa qatysýshylardyń pikirinshe, ózge de jaýapty memlekettik organdarmen birlesip, navıgatsııa kezinde kemedegi órtti sóndirý, tótenshe jaǵdaılar kezindegi shuǵyl áreketter boıynsha shuǵyl-taktıkalyq oqýlardy sekildi basqa da sharalardy uıymdastyrý teńiz jáne ózen flotyndaǵy apattar sanyn azaıtýǵa septigin tıgizer edi.
Anyqtama:
Qazaqstanda 290 teńiz, 826 ózen jáne 29 374 shaǵyn sý kemeleri (shaǵyn sý kemeleriniń qataryna: gıdrotsıklder, motorly qaıyqtar, katerler, esý qaıyqtary,úrmeli qaıyqtar men katamarandar, jelkendi qaıyqtar kiredi) tirkelgen.
2005 jyldan beri shaǵyn sý kemeleriniń sany 70% nemese 12 myń birlikke, teńiz flotynyń sany 2,7 ese nemese 180 kemege kóbeıdi.
