2012 jyly sottarda 500 myńnan astam azamattyq is qaraldy - Ádilet mınıstri
Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine tóreliktiń jáne aralyq sottyń qyzmetin jetildirý máseleleri boıynsha ózgerister men tolyqtyrýlar engizý týraly» zań jobasy boıynsha baıandaǵan Ádilet mınıstri Berik Imashev osylaı málim etti.
Mınıstrdiń málimeti boıynsha, elimizde 2010 jyly sottar shamamen 700 myńǵa jýyq azamattyq isti qaraǵan. Bul rette, qaralǵan azamattyq isterdiń jalpy sanynyń 75 paıyzy talap qoıý, shaǵymdaný isterin júrgizýdi qurap otyr. Al, 2011 jyly sottar qaraǵan 500 myńnan astam azamattyq istiń 74 paıyzy da talap qoıý, shaǵymdaný boıynsha isterdi quraıdy.
«Byltyr da 500 myńnan astam azamattyq is sottarda qaralsa, olardyń 70 paıyzy talap qoıý boıynsha is júrgizýdi quraǵan. Osy kórsetkishterdiń ózi búgingi kúni sottarda azamattyq isterdi qaraýdyń júktemesi asa úlken ekenin kórsetedi. Osy rette toqtala ketetin jáıt, 2011 jyly aralyq sottar tek 22 isti, al tórelik 3 isti ǵana qaraǵan. Sondyqtan da bizdiń pikirimizshe, aralyq sottardyń jáne tóreliktiń quziretin keńeıtý memlekettik sottardyń júktemesin aıtarlyqtaı azaıtýǵa múmkindik beredi»,-dedi mınıstr B. Imashev.
