2012 jyly mal sharýashylyǵyn sýbsıdııalaý kólemin arttyrý kózdelip otyr - vıtse-mınıstr

ASTANA. 2 jeltoqsan. QazAqparat /Gúlmıra Alıakparova/ - Qazaqstanda 2012 jyly mal sharýashylyǵyn sýbsıdııalaý kólemin arttyrý kózdelip otyr. Bul týraly búgin Astanada «Aýyl sharýashylyǵynda bıýdjettik qarajattyń úlestirilýiniń ashyqtyǵy» taqyrybymen ótken dóńgelek ústel otyrysy barysynda QR Aýyl sharýashylyǵy vıtse-mınıstri Múslim Ómirııaev málim etti.

«Qazaqstanda mal sharýashylyǵyn qoldaý úshin 2011 jyly respýblıkalyq bıýdjetten 23,9 mlrd. teńge sýbsıdııa bólindi. Onyń 5,1 mlrd. teńgesi asyl tuqymdy mal sharýashylyǵyna, 18,8 mlrd. teńgesi mal sharýashylyǵynyń ónimdiligin jáne ónim sapasyn arttyrýǵa baǵyttaldy. Sýbsıdııanyń kólemi jyl saıyn artyp otyrǵanyn atap ótý kerek. Máselen, 2012 jyly atalmysh baǵytqa sýbsıdııanyń kólemi 30 mlrd. teńgeni quraıtyn bolady», - dedi ol.

M.Ómirııaev atap kórsetkendeı, óńirler boıynsha jasalǵan taldaýdyń nátıjesi, sýbsıdııalaý boıynsha bıýdjettik baǵdarlama tıimdi júzege asyp otyrǵanyn kórsetti jáne óziniń oń nátıjesin berip keledi. «Naqty aıtqanda, asyl tuqymdy mal basy kóbeıdi jáne maldardyń jalpy sanyna shaqqanda olardyń úles salmaǵy artty. Sondaı-aq aýyl sharýashylyǵy ónimderin óndirýshiler shyǵaryp otyrǵan mal sharýashylyq ónimderdiń kólemi artty», - dedi vıtse-mınıstr.

Onymen bir mezgilde, vedomstvo ókiliniń sózine qaraǵanda, aýyl sharýashylyq maldarynyń ónimdiligi áli de tómen kúıinde qalyp otyr. Máselen, 2011 jyldyń nátıjesi boıynsha, ónimdilik - 1 sıyrǵa 2 myń lıtrden sál asady. Damyǵan elderde bul araqatynas 1/6-7 myń lıtrdi, Reseıde 1/4 myń lıtrdi quraıdy, al Ýkraına 1/5 myń mejesine jaqyndaýda. «Bul baǵytta bizge talaı jumys isteý qajet», - dep túıindedi M.Ómirııaev.