2012 jyly Qazaqstannyń aýyl sharýashylyǵy taýarlary eksporty kólemi 1,6 ese artty - A.Mamytbekov
Bul týraly búgin «Nur Otan» HDP-nyń saılaýaldy tuǵyrnamasynyń oryndalý máselesine arnalǵan Úkimettiń selektorlyq rejimdegi otyrysynda Aýyl sharýashylyǵy mınıstri Asyljan Mamytbekov málim etti.
Onyń atap ótýinshe, jalpy eksporttyq kólemde aýyl sharýashylyǵy taýary eksportynyń úlesi óspegenimen, absolıýttik mólsheriniń kúrt artýy baıqalady.
«2012 jyldyń qorytyndysy boıynsha qazaqstandyq agrarlyq azyq-túlik taýarlary eksportynyń jalpy kólemi 2011 jylmen salystyrǵanda 1,6 ese artyp, 3,128 mln. AQSh dollaryn qurap otyr», - dedi ol.
Mınıstrdiń aıtýynsha, 2012 kúntizbelik jylda astyq eksporty astyqqa shaqqandaǵy undy qosa alǵanda 11 mln. tonnany quraǵan. Bul táýelsizdik jyldaryndaǵy Qazaqstannyń astyq eksporty boıynsha rekordtyq kórsetkishine teń.
«Al marketıngtik jyldy esepteıtin bolsaq, 2011 jyldyń qyrkúıeginen 2012 jyldyń qyrkúıegine deıingi aralyqta bul kólem 12,6 mln. tonnany quraıdy», - dedi A.Mamytbekov.
