2012 jyly Qazaqstannyń 537 mektebine «E-learning» júıesi engiziledi
ASTANA. 2 aqpan. QazAqparat - Bilim jáne ǵylym mınıstrligi elektrondyq oqytýdy engizý boıynsha júıeli jumys júrgizip keledi, dep
habarlady Bilim jáne ǵylym mınıstrliginiń Strategııalyq josparlaý jáne aqparattyq tehnologııalar departamenti dırektory Amantaı Nurmaǵambetov Pm.kz saıtyna bergen arnaıy suhbatynda.
«Biz elektrondyq oqytý úderisiniń oqýshylardy daıyndaý sapasyna qatysty álemdik tájirıbeni zerttedik. Ótken jyldan bastap Qaraǵandy oblysynda, Almaty jáne Astana qalalarynda 44 bilim oshaǵynda osy joba qolǵa alyndy. Al aǵymdaǵy jyly osy júıege 537 mektepti qosý, al 2013 jyly - 900 mektepti qosý josparlanyp otyr», - dedi Amantaı Nurmaǵambetov.
Onyń aıtýynsha, 2015 jylǵa qaraı bilim oshaqtarynyń teń jartysy, al 2020 jylǵa deıin -90% jýyǵy «E-learning» júıesine qosylatyn bolaly. «E-learning» júıesi engizilgennen keıin, oqý protsesin basqarý aýysady. Sandyq bilim resýrstaryn qoldaný oqýshylardyń sabaq protsesine, baǵdarlamany ıgerýge degen yqylastaryn arttyryp, sonyń arqasynda bilimniń sapasy da arta túspek.
Jalpy alǵanda, Mınıstrlik bilim berýdiń barlyq deńgeıin jańǵyrtý jónindegi jumys júrgizýde, barlyq reformanyń áleýmettik áseri zor.
«Biz qolǵa alyp otyrǵan ınnovatsııalardyń nátıjesin 10-20 jyldan keıin kóre bastaımyz. Al bilim berý resýrstaryna keler bolsaq, byltyr 400-den astam resýrs ázirlendi, aǵymdaǵy jyly olardyń sanyn 7000-nan asyrý josparlanýda. Sandyq bilim resýrstarynyń kontenti mazmundy jáne qyzyqty bolýy úshin, kontentpen aınalysatyn fırmalardyń arnaıy konsortsıýmy qurylýda»,- dep habarlady A.Nurmaǵambetov.
Konsortsıýmǵa tek otandyq fırmalar ǵana emes, halyqaralyq kompanııalar da kiredi. 2011 jyly jobalaýmen tek otandyq mamandar, atap aıtqanda Bilim jáne ǵylym mınıstrliginiń janyndaǵy Ulttyq aqparattandyrý ortalyq mamandary aınalyssa, bıyl bul protseske Ulybrıtanııa, Rýmynııa jáne basqa elderdiń kompanııalary qosylady.
«2011 jyly Qazaqstan tarıhy páni sandyq formatqa aýystyryldy, endi taǵy jeti pán - algebra, geometrııa, hımııa, fızıka jáne t.b. pánder qolǵa alynady», - dedi A.Nurmaǵambetov óz sózinde.
A.Nurmaǵambetov óz sózinde, sondaı-aq, qazirgi tańda elimizdegi barlyq mekteptiń 41 paıyzy keń jolaqty Internet jelisine qosylǵanyn aıtty.
