2012 jyly Qazaqstanda túrkitildes Vıkıpedııalardyń konferentsııasy ótedi
ASTANA. 18 jeltoqsan. QazAqparat - Jahandyq Vıkıpedıa qorynyń («Wikimedia Foundation») bastamashylyǵy boıynsha 2012 jyly Qazaqstanda túrkitildes Vıkıpedıalardyń konferentsııasy ótedi, dep habarlady «WikiBilim» qoǵamdyq qorynyń jetekshisi Raýan Kenjehanuly Pm.kz saıtyna bergen suhbatynda.
«Entsıklopedııanyń qazaqsha nusqasynyń tez damyp, jobanyń sátti júzege asyrylyp jatqanyn kórgen Qor, Qazaqstannyń tájirıbesin basqa túrkitildes elderine taratýdy usyndy. 2012 jyly kóktemde Qazaqstanda túrkitildes Vıkıpedıalardyń konferentsııasyn ótkizý josparlanýda», - dedi R.Kenjehanuly.
Ol sondaı-aq, 117 myń maqalaǵa qol jetkizgen «Qazaqsha Vıkıpedıa» jobasynyń 170 myń maqalasy bar túrik entsıklopedııasynan keıin ekinshi orynda ekenin atap kórsetti. Ózbekstan, Túrkimenstan, Qyrǵyzstan sııaqty túrkitildes elderde maqalalardyń sany 9 myńnan aspaıdy.
«Atalǵan elderdiń Vıkı-qoǵamdastyqtary bizdiń jetisterimizben tanysýǵa jáne óz kontentterin damytý úshin bizdiń tájirıbemizdi ıgerýge múddeli», dep atap kórsetti joba jetekshisi.
Aǵymdaǵy jyly tamyzdyń 4-i men 7-si aralyǵynda Izraıldiń Haıfa qalasynda ótken «Wikimania-2011» konferentsııasynyń qorytyndysy boıynsha Qazaqstandyq «WikiBilim» qory «2011 jyldyń ǵalamdyq vıkıpedıashysy» ataǵyn ıelenip (Global Wikipedian of the Year), Vıkıpedıanyń negizin qalaýshy Djımmı Ýeılstiń (Jimmy Wales) arnaıy grantyn jeńip aldy. «Qazaqsha Vıkıpedıa» jobasyndaǵy maqalalardyń sany 117 myńǵa jetti. Joba Qazaqstan Respýblıkasy Úkimetiniń qamqorshylyǵymen jáne el Premer-Mınıstri Kárim Másimovtiń qoldaýymen júzege asyrylýda.
